Kamolwan
Chanago w’imyaka 18 y’amavuko, yagize ikibazo cyihariye ubwo yari ari gutanga
ijambo rye mu ijonjora rya Miss Grand Thailand 2026 ryabaye ku wa 25 Werurwe
2026.
Mu
gihe yari akomeje kuvuga, amenyo y’amakorano (veneers) yari yambaye yaje
kurekurana, bituma amagambo ye asa n’ahindutse.
Mu
mashusho yakwirakwiye ku mbuga nkoranyambaga, uyu mukobwa agaragara ahindukira
byihuse akayatunganya (amenyo), mbere yo kwisubiraho akagaruka ku rubyiniro
afite isura ituje, ubundi agatangira urugendo rwe nk’uwerekana imideli nta
kintu na kimwe kimuhungabanije.
Yari
yambaye ikanzu ishashagirana y’ibara ryerurutse iriho n’umwambaro w’ubwoya ku
ntugu, akomeza kumwenyura no kwiyereka abakurikiranaga irushanwa. Yasoje anyuze
imbere y’imbaga y’abantu bamwakiriye n’amashyi menshi, benshi batangazwa
n’uburyo yitwaye nk’umunyamwuga.
Bamwe
mu bari aho batangaje ko uburyo yakemuye icyo kibazo ari ubwa mbere babonye
umuntu abyitwaramo gutyo.
Umwe
yabwiye ikinyamakuru People ati “Yabyitwayemo neza kurusha uko benshi muri twe
twabyitwaramo mu gihe twagize ikibazo cyoroheje nko kutunganya umusatsi.”
Undi
we yavuze ko nubwo byari biteye isoni, byari igitangaza kubona akomeza nta
kintu kimubayeho.
Abategura
irushanwa rya Miss Grand International batangaje ko icyo kibazo cyari gito
kandi kitari giteganyijwe, ariko bashimangira ko Chanago yakigaragarijemo
icyizere n’ubunyamwuga, bituma igikorwa gikomeza nta nkomyi.
Iri
rushanwa rihuza abakobwa 77 bo muri Thailand, bahatanira ikamba rya Miss Grand
Thailand 2026, uzegukana iri kamba akaba azahagararira igihugu cye mu
marushanwa ya Miss Grand International 2026 azabera mu Buhinde mu Ukwakira
2026.
Umuhango
usoza iri rushanwa uteganyijwe ku wa 28 Werurwe 2026, ukazabera muri MGI Hall i
Bangkok.
Nubwo
amenyo yamugoye ku rubyiniro, Kamolwan Chanago yakomeje nk’aho nta cyabaye,
yigaragaza nk’umunyamwuga nyakuri