Iyi mikino ya gicuti yari ku ngengabihe mpuzamahanga ya FIFA, aho Tanzania yari kubanza gukina na Uganda Cranes ku ya 5 Kamena mbere yo guhura n'Amavubi ku ya 9 Kamena.
Mu itangazo ryashyizwe hanze na TFF, yavuze ko ubuyobozi bwa Maroc bwafashe icyemezo cyo guhagarika iyo mikino mu rwego rwo kwirinda ingaruka z'icyorezo cya Ebola gikomeje guteza impungenge mu bice bimwe bya Afurika.
TFF yagize iti: "Imikino ibiri ya gicuti y'Ikipe y'Igihugu ya Tanzania (Taifa Stars) yari iteganyijwe kubera mu mujyi wa Marrakesh muri Maroc yasubitswe. Icyemezo cyo kuyisubika cyafashwe nyuma y'uko inzego z'Ubuyobozi za Maroc ziyihagaritse mu rwego rwo kwirinda no gukumira ibyago by'ikwirakwira ry'indwara ya Ebola."
Nubwo hari amakuru avuga ko Maroc yafashe ingamba zikomeye zo gukaza igenzura ry'ubuzima ku mipaka yayo, raporo zitandukanye zigaragaza ko icyo gihugu nta murwayi wa Ebola urahagaragara ku butaka bwacyo.
Ahubwo impungenge zikomoka ku cyorezo kiri kwibasira cyane Repubulika Iharanira Demokarasi ya Congo ndetse kikaba cyaranageze muri Uganda.
Ishami ry'Umuryango w'Abibumbye ryita ku Buzima (WHO) ryatangaje ko iki cyorezo cyatewe n'ubwoko bwa Ebola buzwi nka Bundibugyo, kandi ko kugeza ubu cyamaze kwandura abantu amagana muri RDC no muri Uganda, bituma gifatwa nk'ikibazo cy'ubuzima rusange ku rwego mpuzamahanga.
Gusubikwa kw'iyi mikino ni inkuru mbi ku makipe y'ibihugu yari yiteze kuyikoresha yitegura imikino iri imbere, cyane cyane Amavubi akomeje urugendo rwo kwiyubaka no gutegura amarushanwa mpuzamahanga ateganyijwe mu mezi ari imbere yo gushaka itike y'Igikombe cya Afurika cya 2027.
Kuri ubu haracyibazwa niba umukino Amavubi yari afitanye na Comoros tariki ya 06.06.2026 wo uzakinwa, gusa ntiharafatwa umwanzi wa nyuma ko uyu mukino wo utakibaye.
Itangazo ry'Ishyirahamwe ry'umupira w'amaguru muri Tanzania risubika imikino ya Gicuti yari kuzabera muri Morocco