Umukinnyi wa filime Jodie Turner-Smith yatse gatanya umugabo nyuma y'imyaka 4 barushinze

Gatanya ikomeje gusya itanzitse mu ngo z'ibyamamare by'imahanga, kuri ubu yageze mu rugo rw'abakinnyi ba filime bahagaze neza i Hollywood, aribo Jodie Turner-Smith n'umugabo we Joshua Jackson nyuma yo kumarana imyaka ine (4) barushinze bagiye guhana gatanya buri umwe afate iye nzira.

Jodie Turner-Smith wahoze ari umunyamideli akaza kubireka yinjira mu gukina filime zakunzwe zirimo nka 'Queen & Slim', 'The Independent', 'Without Remorse' n'izindi, niwe wafashe iya mbere yaka gatanya umugabo we. Kuri uyu wa Mbere w'iki cyumweru nibwo Jodie yagejeje impapuro zaka gatanya mu rukiko rukuru rwa Los Angeles nk'uko TMZ yabitangaje.

Jodie Turner-Smith yatse gatanya umugabo we Joshua Jackson

Muri izi nyandiko ariko ntabwo Jodie Turner-Smith yigeze agaragaza impamvu zitumye yaka gatanya Joshua Jackson, ahubwo zagarukaga ku kuba yifuza ko bose bahabwa uburenganzira ku mwana (Shared Child Custody) wabo w'umukobwa aho kugirango ahabwe umubyeyi umwe nyuma ya gatanya.

Impamvu zatumye Jodie Turner yaka gatanya umugabo we yazigize ibanga

Umwongerezakazi Jodie Turner-Smith w'imyaka 37 yakundanye na Joshua Jackson w'imyaka 45 kubera umuhanzi w'icyamamare Usher wabahuje. Mu 2018 ubwo Usher yizihizaga isabukuru y'imyaka 40 y'amavuko yatumiye abasitari benshi barimo na Jodie na Joshua, ubwo bahuriraga mu rugo rw'uyu muhanzi Usher yabwiye Joshua Jackson ko Jodie Turner ari umufana we ukomeye wamukunze kuva yamubona muri filime yakinnye yitwa 'Dawson's Creek'.

Jodie na Joshua batangiye gukundana mu 2018 nyuma yo guhuzwa n'umuhanzi Usher

Kuva icyo gihe Usher yabahuza batangiye kuba inshuti birangira batangiye kurambagizanya. Urukundo rwabo rwaje gukomera baza kurushinga mu Kuboza kwa 2019. Mu 2020 baje kwibaruka imfura yabo y'umukobwa ufite imyaka 3 ubu. Aba bombi bagiye guhana gatanya bari bamaranye imyaka 4 gusa barushinze.

Batandukanye nyuma y'imyaka 4 barushinze banaherutse kwibaruka umukobwa