Levine yapfiriye iwe mu gace ka Tarzana, muri California, ku wa Kane tariki ya 20 Kanama 2026. Umuvugizi we w’igihe kirekire, Brandon Kjar, yabwiye ikinyamakuru People ko yapfuye asinziriye.
Kjar yavuze ko nubwo Levine yari afite imyaka 97, yari agikomeza gukora umwuga we. Ati yari agikomeza kujya mu biganiro byo gushaka abakinnyi kandi yari yakoze muri Kamena 2026.
Amakuru yatanzwe n’Urwego rw’Igipolisi rwa Los Angeles (LAPD), nk’uko NBC4 Los Angeles yabitangaje, avuga ko urupfu rwa Levine rwagaragazaga ko rwaturutse ku mpamvu zisanzwe.
Bunny Levine yavukiye i Orange, muri New Jersey, yitwa Bernice Levine. Yize amashuri makuru muri Kaminuza ya New York (NYU) no muri Columbia University, aho yabonye impamyabumenyi za Master. Nyuma yaho yakoze nk’umubitsi w’ibitabo ndetse n’umwarimu mu mashuri, mbere yo guhitamo gutangira umwuga wo gukina filime.
Yatangiye kugaragara muri filime mu myaka ya 1990. Mu mafilime ye ya mbere harimo Cadillac Man yo mu 1990, yakinnye ari kumwe n’abakinnyi bakomeye nka Robin Williams na Tim Robbins.
Mu 1991, Levine n’umugabo we Bernard S. Levine bashinze umuryango witwa Actors Connection i New York, wafashaga abakinnyi bashya gutangira no guteza imbere umwuga wabo.
Nyuma yagaragaye mu biganiro bitandukanye bya televiziyo, birimo Law & Order, Ugly Betty, Gilmore Girls, Criminal Minds, 2 Broke Girls, Raising Hope, New Girl, Shameless na Sprung.
Mu 2016, Levine yanakinnye muri filime La La Land, yakinnye n’abakinnyi Emma Stone na Ryan Gosling. Yagaragaye kandi muri filime You Don’t Mess with the Zohan na Sandy Wexler, zombi zakinnye n’umunyarwenya Adam Sandler.
Imirimo ye ya nyuma yamamaye harimo filime The Cure yasohotse mu 2026 ndetse na filime ngufi yitwa Achiever.
Bunny Levine asize abana batatu, Marty, Francie na Joe, ndetse n’abuzukuru be Robin na Jeffrey.
Umuhango wo kumwibuka uteganyijwe kubera kuri Jewish Memorial Chapel i Clifton, muri New Jersey, ku wa Kane tariki ya 27 Kanama 2026.