David Rubenstein, umwe mu bashinze ikigo cy'ishoramari cya
Carlyle Group akaba na nyiri ikipe ya baseball ya Baltimore Orioles, yashakanye
na Caryn Zucker mu muhango wabereye i Washington, DC ku wa Gatanu.
Icyatangaje benshi ni uburyo uyu muhango wateguwe mu ibanga
rikomeye, ku buryo n'abantu benshi bo mu itangazamakuru batigeze bamenya ko
uteganyijwe mbere y'uko uba.
Ubukwe bwabo bwari buyobowe na John Roberts, Perezida
w'Urukiko rw'Ikirenga rwa Amerika, bwitabiriwe gusa n'abagize imiryango yabo
n'inshuti za hafi.
Ndetse na gafotozi usanzwe ufitira ibyamamare Tony Powell
wari watumiwe gufata amafoto. Igitangaje ni uko yavuze ko yamenye ko agiye
gufotora mu bukwe hasigaye iminota 15 gusa ngo umuhango utangire.
Mu butumwa yashyize ku mbuga nkoranyambaga, Powell yavuze ko
ari "ibanga rikomeye kurusha andi yose yabonye muri uyu mwaka."
Amateka ya Caryn Zucker yakunze kuvugisha benshi
Aya makuru yatumye benshi bongera kwibuka Caryn Zucker,
wahoze ari umugore wa Jeff Zucker, umwe mu bayobozi bakomeye babayeho muri CNN.
Jeff na Caryn batandukanye mu mwaka wa 2017 nyuma y'imyaka
myinshi babana ndetse bafitanye abana bane.
Nyuma yo gutandukana, amakuru menshi yavuzwe ku mubano wa
Jeff Zucker na Allison Gollust, wari umwe mu bayobozi bakuru ba CNN. Ibyo byaje
kwemezwa muri 2022 ubwo iperereza ry'imbere muri CNN ryagaragazaga ko bombi
bari mu mubano wihariye batigeze batangaza nk'uko amategeko y'ikigo
yabibasabaga.
Ibyo byatumye Allison Gollust yirukanwa, naho Jeff Zucker
yegura ku buyobozi bwa CNN.
Abasesenguzi bamwe bavuga ko ayo mateka ashobora kuba ari
imwe mu mpamvu zatumye Caryn Zucker ahitamo kubaka umubano we mushya na David
Rubenstein mu ituze, kandi kure camera z'itangazamakuru.
Urukundo rw’imyaka ine
N’ubwo David Rubenstein na Caryn Zucker bari bamaze imyaka
igera kuri ine bakundana, bombi bakomeje kubaho ubuzima bwabo bwite mu ibanga.
Gusa bagiye bagaragara bari kumwe mu bikorwa by'ubugiraneza,
ibirori by'umuco ndetse n'ibirori byitabirwaga n'abantu bakomeye muri Amerika.
David Rubenstein azwi nk'umwe mu baherwe bafite uruhare
runini mu bikorwa by'ubugiraneza. Umutungo we ubarirwa muri miliyari zirenga
enye z'amadolari y'Amerika.
Yatanze amafaranga menshi mu bikorwa byo kubungabunga
amateka, guteza imbere uburezi, ubuvanganzo n'ibigo ndangamuco.
Mu mwaka wa 2025 yahawe Presidential Medal of Freedom, kimwe
mu bihembo bikomeye bihabwa abasivili muri Amerika.
Ku ruhande rwa Caryn Zucker, na we azwi cyane mu bikorwa
by'ubugiraneza ndetse yagiye akorana n'imiryango ifasha urubyiruko n'abaturage
mu nzego zitandukanye.
"Ubukwe bw'ibanga bw'umwaka"
Nyuma y'uko amakuru y'ubu bukwe amenyekanye, abantu benshi
bagaragaje gutungurwa n'uburyo aba bombi babashije kubugira ibanga kugeza ku
munota wa nyuma.
Ikinyamakrur New York Post cyatangaje ko hari amakuru avuga
ko bashobora kuba bari mu kwezi kwa buki mu Burayi, n’ubwo nta ruhande
rurabihamya ku mugaragaro.
Kubera uburyo bwateguwe nta rusaku, nta matangazo
yabubanjirije ndetse nta makuru menshi yari yarigeze ashyirwa hanze, benshi
bamaze kwita ubu bukwe bwa David Rubenstein na Caryn Zucker "ubukwe
bw'ibanga bw'umwaka wa 2026."
Aba bombi, bagaragaye bari kumwe muri Hadrian Gala yo mu 2025
N'ubwo urukundo rwabo twari rutuje, ariko bagiye bagaragara kenshi bari kumwe mu birori bitandukanye, bari bamaranye imyaka 4.