Turahura tukaganira tugasabana tugasangira tugatarama tukishima tukanashima Rurema nyiriubuzima. Tureba inyuma tukisuzuma, ibyagenze neza tukabishima ahabuze imbaraga tugahiga kuzongera tukahahindura.
Dutangirana mva rugamba tugasozanya njya rugamba tugacinya akadiho tukishimira ibyagezweho. Duhigira kubirinda no gukora bikanda, twese nk'Abanyarwanda bene Kanyarwanda.
Yoooh, dore ntuza w'irunaka utarahinduka ararunguruka. Iyambure abagushuka uze udusanganta gihunga. Egera hino tuganire, ibitekerezo bibi ubihindure, umutima wawe uwuruhure n’ubuzima bwawe ubutabare.
Sezerera urwo urwango usubire ku murongo ugaruke mu muryango, ukomere ku gihango. Ubu u Rwanda rurakataje, ruratuje bitangaje, ruratatse bishimishije, ni rwiza bihebuje. Twariyunze birakunda, turiga tugatsinda, ubu turimo n'abahanga bayoboye mu ikoranabuhanga. Mu Rwanda ni amahoro, hagarutse itorero, buri wese atozwa indero n’indangagaciro.
Turasurwa tukakira bakanezerwa bakarara bugacya bagasubira, bamwe bakanatura. Turahinga, tugatera bikamera tukuhira, bigakura tukabagara bikera tugasarura. Umunyarwanda agira gahunda dukora n’umuganda, u Rwanda ruzira umwanda twiyemeje kururinda.
Abana bararerwa, abarwayi baravurwa, abatishoboye barashyigikirwa, abakosheje bagakosorwa. Uwiga yimuka akanahitamo icyo ashaka hatagendewe ku ho avuka, twahinduye amateka. Ubumwe turabwimika, umurimo turawuyoboka, igihugu tucyubaka, twese dufite ishyaka.
N’ababa mu mahanga, bagenda nta gihunga, bemye bashize amanga, rwose nta gihunga. Baravoma bakuzuza, barakora bakinjiza, barahaha bagapakira, bakazana tugasangira. Umuturage ari ku isonga, ubufatanye buraturanga, turatarama bigatinda, hehe n’agahinda.
Yewe, ndabona amasaha agenda, ngaho reka mbe ngiye, gusa ubutumwa nguhaye, ubukoreshe igikwiye. Kandi wibuke abo wasize, uzirikane aho wabasize uzabashake ubakize nabo bagereaho ugeze.