Aya makuru yemejwe ku wa Gatandatu, tariki ya 4 Nyakanga 2026, na Minisitiri w'Ubuzima w'u Bufaransa, Stéphanie Rist, wavuze ko uwo muganga yamaze kuva mu bitaro agasubira iwe nyuma yo gukira burundu.
Uyu muganga yageze mu Bufaransa ku wa 23 Kamena 2026, avuye muri Repubulika Iharanira Demokarasi ya Congo, igihugu gikomeje guhangana n'icyorezo cya Ebola kimaze guhitana abantu babarirwa mu magana. Nyuma yo kumusuzuma, abaganga basanze yaranduye Ebola, maze atangira kwitabwahpo n’abaganga.
Abashinzwe ubuzima bavuga ko ubwo yari mu ndege ya sosiyete Air France, uwo muganga nta bimenyetso bikomeye yari afite usibye kuribwa umutwe. No mu gihe yari ari kuvurirwa mu Bitaro bya Bichat i Paris, yakomeje kugira ibimenyetso byoroheje cyane.
Inkuru dukesha ikinyamakuru France24 ivuga ko, nyuma yo kuvurwa no gukorerwa ibizamini bibiri bya PCR byagaragaje ko nta virusi ya Ebola ikiri mu mubiri we, abaganga bemeje ko yakize burundu, bityo yemererwa gusubira iwe.
Mu rwego rwo gukumira ko iyo ndwara yakomeza gukwirakwira, abantu batanu bari kumwe na we mu ndege bahise bashyirwa mu kato ko mu ngo zabo mu gihe cy'iminsi 21 kugira ngo bakurikiranwe.
Nubwo uwo muganga yakize, icyorezo cya Ebola gikomeje guteza impungenge muri Congo. Imibare iheruka gutangazwa n'inzego z'ubuzima muri icyo gihugu ku wa 2 Nyakanga 2026 igaragaza ko kuva iki cyorezo cyatangazwa ku wa 15 Gicurasi, kimaze kwandura abantu 1,406, muri bo abarenga 438 bamaze guhitanwa na cyo.
Inzego z'ubuzima zikomeje ibikorwa byo gukurikirana abahuye n'abarwayi, gusuzuma abanduye no gufata izindi ngamba zigamije gukumira ko Ebola yakomeza gukwirakwira, haba muri DRC no mu bindi bihugu bishobora kwakira abantu baturutse mu bice byibasiwe n'iki cyorezo.