Umugabo ufite igitsina kingana na santimetero imwe arasaba Miliyoni 30 Frw yo kucyongeresha

Michael, utuye muri Leta ya North Carolina muri Leta Zunze Ubumwe za Amerika, avuga ko igitsina cye gifite uburebure bwa santimetero imwe (1 cm) iyo cyafashe umurego, ibintu byatumye ubuzima bwe bwa buri munsi bugorana ndetse bikamugiraho ingaruka zituma atigirira icyizere, ndetse bikamubangamira mu mibereho ye.

Mu butumwa yashyize ku rubuga rwe rwa GoFundMe, yasobanuye ko amaze igihe azigama amafaranga yo kwivuza, ariko ko atarabasha kubona ayo akeneye yose kugira ngo akorerwe ubu buvuzi.

Yagize ati: "Narakoze cyane kugira ngo mbashe kwizigamira amafaranga azamfasha kwivuza no guterwa imiti ishobora kongera ubunini bw'igitsina cyanjye. Ariko ndacyakeneye ubufasha kugira ngo mbone amafaranga yose asabwa."

Inkuru dukesha ikinyamakuru Daily Star ivuga ko, Michael yavuze ko ubu buvuzi butazamukiza burundu ikibazo cya micropenis, ariko ko buzamufasha kubaho ubuzima busanzwe kurushaho no kugabanya ibibazo ahura na byo buri munsi.

Ati: "N’ubwo ubu buvuzi butazakuraho ikibazo mfite, buzamfasha cyane kubaho neza, gukoresha ubwiherero mu buryo busanzwe no kongera kugira icyizere."

Uyu mugabo yavuze ko kimwe mu bintu bimugora cyane ari ugukoresha ubwiherero, kuko akenshi bimusaba kwitwararika cyane kugira ngo atiyanduza. Yavuze kandi ko kubera icyo kibazo, hari igihe aba yambara pampa zabugenewe zifasha abafite ikibazo cyo gufunga inkari neza.

Ubuvuzi yifuza gukorerwa bugizwe no guterwa umuti uzwi nka semi-permanent dermal filler, ugamije kongera umubyimba w'igitsina. Abaganga bavuga ko ubu buryo budakiza indwara ubwayo, ahubwo bushobora gufasha bamwe mu bafite iki kibazo kugira imibereho yoroshye kurushaho.

Michael yavuze ko yatangiye kumenya ko hari ikibazo afite akiri mu mashuri yisumbuye, nyuma y'uko umukobwa amubajije ubunini bw'igitsina cye, yabimubwira akamuseka. Icyakora, yavuze ko yaje gusuzumwa n'abaganga bakamwemeza ko afite indwara ya micropenis mu mwaka ushize.

Mu butumwa bwe, yanashimangiye ko intego ye atari ugusaba ko bamugirira impuhwe gusa, ahubwo ari no gufasha abantu kumenya ko micropenis ari indwara izwi mu buvuzi, aho kuba ijambo rikoreshwa gusa mu gutebya cyangwa gusebanya.

Abahanga mu buvuzi basobanura ko micropenis ari indwara umuntu avukana, aho igitsina kiba gifite uburebure buri munsi y'ibisanzwe bitewe n'imiterere y'umubiri cyangwa imisemburo. Mu bihe bimwe, ishobora kuvurwa hakiri kare mu bwana, mu gihe ku bantu bakuze hifashishwa ubundi buryo bwo kugabanya ingaruka zayo ku mibereho ya buri munsi.

Michael yavuze ko yizeye ko ubufasha azabona buzamufasha kubaho ubuzima bwisanzuye kurushaho no kongera icyizere cyo gukora ibikorwa bya buri munsi atabangamiwe n'iki kibazo amaze imyaka myinshi ahanganye na cyo.