Umugabo ntiyaremewe kuryamana n’umugore umwe gusa – 2Face

Ibi yabitangaje mu kiganiro giherutse gutambuka, nyuma y’amezi atanu yari amaze atandukanye n’umugore we Annie Macaulay Idibia, bari bamaranye imyaka 12 barushinze. Uku gutandukana kwabo byabaye inkuru ikomeye ndetse ikurura impaka ndende, cyane cyane ku mbuga nkoranyambaga.

Nyuma yo gutangaza ko yatandukanye n’uwo bari bashakanye, 2Face yahise anerekana ku mugaragaro umukunzi mushya witwa Natasha Osawuru, ibintu byatunguye benshi.

Mu kiganiro yagiranye n’umunyamakuru Nedu, 2Face yavuze ko ku giti cye yumva bidashoboka ko umugabo aba uwo kuryamana n’umugore umwe gusa.

Yagize ati: “Maze iminsi mbivuga, ndetse byambereye ikibazo, ariko sinabihagaritse. Umugabo ntabwo yaremewe kuba uwo kuryamana n’umugore umwe gusa. Ashobora gukunda umugore umwe, akamuha umutima we, ariko ntabwo bishoboka ko yaba ari we wenyine baryamana.”

Yongeyeho ko ibyo avuga abivuze ku giti cye, atari ku bandi bagabo, ati: “Sinshaka kuvuga ku bandi bagabo, ariko ku bwanjye ni uko mbibona.”

Amakuru dukesha Daily Post agaragaza ko mbere yo gutandukana, Annie yari amaze igihe ashinja 2Face kumuca inyuma. Yigeze gutangaza ko afite abana batanu yabyaranye n’abandi bagore batandukanye.

2Face Idibia ari mu bahanzi bakomeye muri Nigeria ndetse afatwa nk’umwe mu bazamuye injyana ya Afro Beat mu myaka ya kera. Yakunzwe mu ndirimbo nka ‘African Queen’, ‘If Loving You is a Crime’, ‘Rainbow’ n’izindi.

Umuhanzi 2Face yemera ko umugabo ashobora gukunda umugore umwe ariko ataremewe kuryamana n'umugore umwe