Kuwa Mbere w'iki Cyumweru ni bwo ku mbuga nkoranyambaga hacaracaye amakuru avuga ko Minisiteri ya Siporo yaba yandikiye FERWAFA iyisaba ko amatora ya Komite nyobozi yayo ateganyijwe tariki ya 30 Kanama 2025 yahagarikwa. Mu gitondo cyo kuri uyu wa Kabiri Minisiteri ya siporo na FERWAFA babihakanye bavuga ko ari ibihuha.
Iby'aya makuru yasakaye cyane ku mbuga nkoranyambaga, byavuye ku ibaruwa yanditswe na bamwe mu bagize komite Nyobozi ya FERWAFA igiye kurangiza manda, ari bo Ngendahayo Vedaste ushinzwe amakipe y’igihugu na Rurangirwa Louis ushinzwe umutekano.
Nk'uko bigaragara mu ibaruwa InyaRwanda ifitiye kopi, bari bayandikiye Minisiteri ya Siporo, Perezida wa FERWAFA, Abanyamuryango b’iri shyirahamwe na Komisiyo y’amatora, babasaba ko amatora yahagarikwa bitewe n’imbogamizi zihari zo kubona ibisabwa ku bashaka kwiyamamaza.
Ku munsi w'ejo abagize Komite Nyobozi ya FERWAFA barateranye batera ubu busabe utwatsi ubundi hahita hatangazwa urutonde rw’agateganyo rw’abakandida bujuje ibisabwa muri aya matora.
Rurangirwa Louis yanditse asaba ko amatora yahagarikwa nyuma y’uko itsinda yarimo ryari rikuriwe na Hunde Walter ryikuye muri aya matora kubera kubura ibyangombwa ubundi agatabaza Perezida Paul Kagame avuga ko harimo uburiganya.
Icyo gihe abinyujije kuri X yanditse ati: ”Amatora ya FERWAFA arimo uburiganya. Nk'umwe mu bagize Komite Nyobozi ya FERWAFA, Nyakubahwa Perezida Paul Kagame ndifuza ko mukurikirana aya matora. Ntibyumvikana uburyo uruhande rumwe rubona ibyangombwa, urundi rukabibura kandi bitangwa n’urwego rumwe rwa Leta”.