Mu myaka ya mbere ya internet, abantu bahuzaga mudasobwa zabo ku muyoboro wa internet bakoresheje insinga (Ethernet cables). Byasabaga ko mudasobwa iba hafi y'aho umuyoboro ugarukira, bikagabanya umudendezo wo kuyikoresha.
Kubera iyo mbogamizi, mu myaka ya 1990 abahanga mu ikoranabuhanga batangiye gukora ubushakashatsi ku buryo internet yakoherezwa hadakoreshejwe insinga.
Ibyo byageze ku ntego mu 1997, ubwo Institute of Electrical and Electronics Engineers (IEEE) yashyiragaho ihame mpuzamahanga rizwi nka IEEE 802.11, ryabaye umusingi w'ikoranabuhanga rya Wi-Fi rikoreshwa kugeza n'ubu.
Nyuma y'imyaka ibiri, mu 1999, hashinzwe Wi-Fi Alliance, umuryango uhuza ibigo bikora ibikoresho by'ikoranabuhanga kugira ngo byubahirize amahame amwe. Ni na bwo izina Wi-Fi ryatangiye gukoreshwa ku rwego mpuzamahanga, rituma ibikoresho by'amasosiyete atandukanye bibasha gukorana nta kibazo.
Wi-Fi ikora ite?
Abantu benshi batekereza ko Wi-Fi ari yo internet, nyamara si ko bimeze. Internet iba ituruka ku sosiyete itanga serivisi zayo (Internet Service Provider), ikagera kuri router iri mu rugo cyangwa ku kazi. Iyo router ihindura uwo muyoboro ikawohereza mu kirere ikoresheje imiraba ya radiyo (radio waves).
Ibikoresho nka telefoni, mudasobwa, televiziyo zigezweho n'ibindi bifite ubushobozi bwo kwakira iyo miraba, bigahita bihuzwa na internet nta gukoresha umugozi. Mu yandi magambo, Wi-Fi ni nk'ikiraro gihuza ibikoresho byawe na internet.
Kuki ukomeza kwishyura internet kandi ukoresha Wi-Fi?
Iki ni kimwe mu bibazo abantu benshi bibaza. Mu by'ukuri, amafaranga wishyura buri kwezi si aya Wi-Fi, ahubwo ni aya serivisi ya internet uhabwa n'isosiyete iyitanga. Wi-Fi ni uburyo bwo gukwirakwiza iyo internet mu rugo, ku biro cyangwa ahandi hose.
Ni nk'uko amazi ava ku muyoboro rusange akinjira mu rugo rwawe, hanyuma imiyoboro yo mu nzu ikayageza mu gikoni, mu bwiherero cyangwa mu bindi byumba. Ntuba wishyura imiyoboro yo mu nzu, ahubwo wishyura amazi.
Ni na yo mpamvu ushobora kujya muri hoteli, café cyangwa ku kibuga cy'indege ugakoresha Wi-Fi ku buntu. Aho hantu ni ho haba hamaze kwishyura internet, hanyuma bagahitamo kuyisangiza abayigana.
Mu myaka irenga 25 ishize Wi-Fi itangiye gukoreshwa ku rwego mpuzamahanga, yagiye itera imbere ku muvuduko udasanzwe.
Uyu munsi hagezwe kuri Wi-Fi 6 na Wi-Fi 7, zitanga internet yihuta kurushaho, zishobora kwakira ibikoresho byinshi icyarimwe kandi zikagabanya igihe internet itinda kugera ku gikoresho (latency).
Ibi byatumye ibikorwa byinshi birimo inama zikorwa hifashishijwe amashusho (video conferences), gukina imikino yo kuri internet no kureba filime zifite amashusho meza cyane (4K na 8K) birushaho kugenda neza.
Abantu benshi batekereza ko Wi-Fi ari impine y'amagambo "Wireless Fidelity." Nyamara si byo. Abahimbye iri zina batangaje ko Wi-Fi ari izina ryatoranyijwe mu rwego rw'ubucuruzi kugira ngo ryoroshye kwibukwa no kwamamaza, atari impine y'amagambo afite ibisobanuro byihariye.
Hashize imyaka irenga 25 Wi-Fi itangiye gukoreshwa ku rwego mpuzamahanga, ariko uruhare rwayo mu iterambere ry'ikoranabuhanga rukomeje kwiyongera. Yahinduye uburyo abantu bakora, biga, bakora ubucuruzi, bareba filime, bumva umuziki ndetse bavugana n'abantu bo hirya no hino ku Isi.
Ni yo mpamvu Wi-Fi ifatwa nk'imwe mu mpinduka zikomeye zabayeho mu ikoranabuhanga. Nubwo abantu benshi bavuga ko "bishyura Wi-Fi", ukuri ni uko baba bishyura internet, mu gihe Wi-Fi yo ari uburyo buyigeza ku bikoresho byabo hadakoreshejwe insinga.