Mu kiganiro na inyaRwanda, Kwame Ernest Osei-Baah yashimangiye ko urubyiruko rukwiye gufata iya mbere, rugahindura impano zarwo n’inzozi amahirwe, bityo rugashobora gutsinda ku isoko ry’umurimo ry’iki gihe rihindagurika buri munsi.
Yemeza ko ikibazo cy’ubushomeri mu rubyiruko kidaterwa no kubura amahirwe, ahubwo giterwa no kubura ubumenyi bukenewe, ubuyobozi bufite icyerekezo n’amahirwe yo guhugurwa.
Abishingiye ku bunararibonye afite mu kuyobora imishinga itandukanye mu bihugu byinshi, agaragaza inzira eshanu z’ingenzi zashobora gufasha urubyiruko kwihangira umurimo no kubaka ubuzima burambye:
Ikoranabuhanga n’Ubuvumbuzi bwa Digital – Abona amahirwe menshi mu nzego nka Artificial Intelligence (AI), umutekano w’amakuru (cybersecurity), isesengura ry’ibipimo (data analytics), iterambere rya software n’ubucuruzi bwa digital. Urubyiruko rwiga izi mpano rushobora guhatanira akazi ku rwego mpuzamahanga rutavuye mu gihugu.
Serivisi Zishyigikira Ubucuruzi – Inzego nk’imicungire y’imishinga (project management), ubujyanama mu by’ubucuruzi, serivisi z’imari, n’ishami ryita ku bakiriya biri kwaguka cyane mu karere k’Afurika y’Iburasirazuba. Kwame avuga ko urubyiruko rw’intangarugero mu murimo rukenewe cyane.
Ubuhinzi n’Ubukungu Burengera Ibidukikije – Kubera impinduka z’ikirere, yizera ko urubyiruko rushobora kwinjira mu buhinzi bugezweho, agri-tech, gutunganya imyanda, no kubaka imishinga ishingiye ku bukungu buzenguruka (circular economy).
Inganda nshya z'imyidagaduro n’ubugeni – Yemeza ko gukora ibihangano, guhanga ibirango, gutunganya amashusho n’amajwi n’ibijyanye n’itangazamakuru byabaye inzira nziza y’iterambere. Bityo, avuga ko urubyiruko rufite impano rufite amahirwe menshi muri uru rwego rw’ubuhanzi ruri kwaguka cyane.
Ubucuruzi Mpuzamahanga n’Ubuhahirane bw’Akarere – Nk’umuntu ukorera mu bihugu bitandukanye bya Afurika, Kwame abona amahirwe menshi y’urubyiruko mu gukora ubucuruzi burenga imipaka hagati ya Rwanda, Uganda, Kenya, Ghana n’ibindi bihugu byibumbiye mu muryango wa EAC na ECOWAS.
Kwame Ernest Osei-Baah ni umunya-Ghana umaze imyaka akorera muri Rwanda, akaba yishimira cyane ibintu bitanu by’ingenzi bimukora ku mutima birimo umutekano n’umudendezo, imiyoborere myiza, umuco wo gukora cyane, iterambere ryihuse n’ubuvumbuzi, ndetse n’isuku n’itunganwa ry’igihugu.
Yizera ko ibindi bihugu byafatira urugero ku Rwanda mu by’imiyoborere ishyira imbere ikoranabuhanga, ubumwe bw’abaturage, korohereza ishoramari no gushora imari mu bushakashatsi.
Ku bijyanye n’Imyidagaduro n’Uburirimbyi mu Rwanda, Kwame yishimira cyane urwego rw’imyidagaduro mu gihugu, ariko nk’umukozi w’Imana, yumva afite isano yihariye n’umuziki wa Gospel. Yemeza ko umuziki wa gospel ufite amavuta y’Imana atuma uruhura imitima.
Mu bahanzi akunda cyane harimo James & Daniella kubera uburyo baririmbamo butuje kandi bwimbitse, ndetse na Israel Mbonyi, aho avuga ko indirimbo ze zifite amavuta kandi zikora ku mitima. Asanga abahanzi ba gospel bo mu Rwanda ari impano ikomeye ku karere ka Afurika y’Iburasirazuba.
Kwame Ernest Osei-Baah ni inararibonye mu micungire y’imishinga, isesengura ry’imari no guteza imbere ubucuruzi. Afite ubunararibonye bw’imyaka irenga icumi mu kuyobora inzego zirimo ubukerarugendo, ubuvuzi n’ubujyanama.
Ubu ni Project Manager Consultant muri Tradeline Consult, aho ashinzwe igenamigambi, ishyirwa mu bikorwa ry’imishinga, ubufatanye n’inzego za leta n’abaterankunga, ndetse no gutoza amakipe y’abakozi. Ni na CEO wa HaKins Ltd, resitora izwi mu mujyi wa Kigali, aho yagaragaje ubuhanga mu micungire n’iterambere ry’ubucuruzi bushingiye ku muco.
Afite impamyabumenyi ya Bachelor of Arts muri Pentecost University (Ghana), n’impamyabushobozi zitandukanye muri Project Management yakuye muri University of California, Irvine. Ubu ari kwiga MBA mu Business Management muri Christian Leadership Institute.
Uretse ubuzima bw’umwuga, Kwame akunda gufasha abandi binyuze muri Purpose Rwanda, umuryango uharanira iterambere ry’abaturage binyuze mu burezi, amahugurwa n’iterambere ry’ubukungu, byamaze gufasha abantu barenga 500. Ni n’umuntu ukunda gusoma, umuziki n’ibijyanye n’indyo yuzuye.
Kwame yagaragaje amaturufu atanu yafasha urubyiruko guhangana n'ikibazo cy'ubushomeri