Nubwo umutima ushobora gutera inshuro 60 ku munota, ntibisobanuye ko ugutera k'umutima mu isegonda rimwe guhwanye n’ukundi. Hari utunyuranyo duto cyane mu gihe kiri hagati yo gutera inshuro ebyiri zikurikirana, ari two twitwa HRV.
Abahanga bavuga ko uko iri tandukaniro rigenda rihinduka ari ko ritanga amakuru ku buryo umubiri ushobora guhangana n’umuhangayiko, umunaniro ndetse n’ubuzima muri rusange.
Ubushakashatsi bugaragaza ko inshuro umutima utera bifitanye isano rya hafi n’imikorere y’imyakura igenzura ibikorwa by’umubiri bidasabye ko umuntu abitekerezaho, nko guhumeka, igogorwa ry’ibiryo ndetse n’imitere y’umutima.
Iyo umubiri umeze neza kandi uruhutse, HRV iba iri hejuru. Iyo umuntu afite stress nyinshi, arwaye cyangwa ananiwe cyane, HRV ishobora kugabanuka.
Abahanga bavuga ko itandukaniro riri hagati y’igihe umutima ufata utera inshuro ku yindi (HRV), bishobora gufasha umuntu kumenya uko ubuzima bwe buhagaze mbere y’uko agaragaza ibimenyetso by’indwara.
Ni yo mpamvu abakinnyi, abaganga ndetse n’abakoresha amasaha y’ikoranabuhanga agezweho bayikurikirana kugira ngo bamenye niba umubiri uri gukora neza cyangwa niba ukeneye kuruhuka.
Nk’uko tubikesha BBC, nta gipimo kimwe cyemewe kivuga ko HRV runaka ari yo nziza kuri buri muntu. Ibi biterwa n’imyaka umuntu afite, imiterere y’umubiri we, imyitozo akora ndetse n’uburyo abayeho.
Ahubwo abahanga bagira inama abantu yo kureba uko HRV yabo igenda ihinduka uko iminsi ishira, aho kwigereranya n’abandi.
Hari ibintu byinshi bishobora gutuma itandukaniro riri hagati y’igihe umutima ufata utera inshuro ku yindi (HRV) yiyongera cyangwa igabanuka aribyo; gusinzira neza, gukora imyitozo ngororamubiri ku rugero, kurya indyo yuzuye ndetse no kugabanya stress.
Ku rundi ruhande, kunywa inzoga nyinshi, kubura ibitotsi, guhangayika bikabije cyangwa gukora imyitozo irengeje ubushobozi bw’umubiri bishobora kuyigabanya.
Muri iki gihe, abantu benshi bapima HRV bifashishije amasaha y’ikoranabuhanga cyangwa ibindi bikoresho byambarwa ku mubiri. Nubwo ibi bikoresho bitagera ku rwego rw’ubushobozi bw’ibipimo byifashishwa kwa muganga nka ECG cyangwa EKG, bishobora gufasha umuntu gukurikirana impinduka z’ingenzi mu buzima bwe no gufata ingamba zo kwirinda mbere y’uko ikibazo gikomera.
Gukurikirana HRV ntibigomba gufatwa nk’uburyo bwo kwisuzumisha indwara, ahubwo ni igikoresho gifasha umuntu gusobanukirwa neza uko umubiri we uhagaze. Abahanga bagaragaza ko igikomeye atari kugira HRV iri hejuru cyane, ahubwo ari ugukomeza kugira ubuzima bwiza butuma umubiri ubasha guhangana n’ihindagurika rya buri munsi.
Mu gihe ikoranabuhanga rikomeje gutera imbere, HRV iri kugenda ifatwa nk’ikimenyetso gishya gishobora gufasha abantu kumenya uko ubuzima bwabo buhagaze.