Uyu mugabo w'imyaka 55 yavuze ko kuva iri rushanwa
ryatangira, imikino yose yayikurikiranaga ari iwe, bityo adashaka guhindura uwo
muco kuko yemera ko wamuhiriye.
Mu kiganiro yagiranye n'itangazamakuru, Milei yagize
ati: "Ntabwo nzajyayo. Nzarebera umukino i Olivos nk'uko nabigenje
ku yindi yose."
Yanagaragaje indi miziririzo akurikiza, avuga ko
kubera ubukonje atajya acana ubushyuhe mu nzu, ahubwo yambara ikote rifite
ikirango cya sosiyete ikora ibikomoka kuri peteroli.
Ati: "Ku mukino wa Suisse numvise ndimo gushyuha
ndiikuramo. Bahise badutsinda igitego. Nahise nongera kuryambara kandi kuva uwo
munsi sinongeye kurikuramo nkiri kureba umukino."
Milei si we wenyine wemera imiziririzo mu mupira
w'amaguru. Umutoza wa Argentine, Lionel Scaloni, na we aherutse kuvuga ko buri
gihe iyo agiye ku kibuga abanza gukandagiza ikirenge cy'iburyo.
Abakinnyi na bo bafite imigenzo yabo. Lionel Messi,
Rodrigo De Paul ndetse na Perezida w'Ishyirahamwe ry'Umupira w'Amaguru muri
Argentine, Claudio Tapia, basanzwe bafata ifoto bari kumwe mbere y'imikino
ikomeye kuva begukana Copa América ya 2021.
Iyo foto bongeye kuyifata mbere ya Finalissima 2022
ndetse na Finali y'Igikombe cy'Isi cya 2022, kandi batsinda iyo mikino yose. Ni
yo mpamvu benshi bemeza ko yababereye umuvuno w'amahirwe.
Argentine irahangana na Espagne ku mukino wa nyuma w'Igikombe cy'Isi ubera kuri Stade ya MetLife kuri iki Cyumweru tariki ya 19 Nyakanga 2026, aho iri bube ishaka kwisubiza igikombe yegukanye mu 2022.
Ni umukino utegerejwe na
benshi, cyane cyane abakunzi b'ikipe y'igihugu ya Argentine bifuza kongera
kubona amateka yisubiramo.