Mu bikorwa bye byamenyekanye cyane harimo inkunga ya miliyoni imwe z’amadolari yatanze muri 2020 muri Vanderbilt University Medical Center, yagize uruhare mu gutera inkunga ubushakashatsi ku ndwara ya COVID-19, harimo n’ubushakashatsi bwagize uruhare mu nzira y’ikorwa ry’urukingo rwa Moderna.
Twifashishije inyandiko yasohotse mu kinyamakuru ZME Science ivuga ku ruhare Dolly Parton mu bushakashatsi, uburezi no kubungabunga ibidukikije, tugiye kurebera hamwe bimwe mu bikorwa byamenyekanye cyane bigaragaza uruhare rwa Dolly Parton mu bushakashatsi n’iterambere rya siyansi.
Yatanze miliyoni imwe y’amadolari mu bushakashatsi ku rukingo rwa COVID-19
Muri Werurwe 2020, ubwo icyorezo cya COVID-19 cyari kimaze gukwira mu bice byinshi by’isi, Parton yatanze miliyoni imwe y’amadolari muri Vanderbilt University Medical Center.
Amafaranga yashyigikiye itsinda ry’abashakashatsi ryakoraga ku buryo bwo gusobanukirwa no kuvura COVID-19.
Vanderbilt ivuga ko inkunga ye yagiye mu bikorwa by’ubushakashatsi byagize uruhare mu gutera imbere kw’ubushakashatsi bwaje kugira uruhare mu igeragezwa rya mbere ry’urukingo rwa mRNA-1273 rwakozwe na Moderna ku bufatanye n’ikigo cy’igihugu cy’Amerika gishinzwe indwara z’ibyorezo.
Ni yo mpamvu inkunga ya Parton yaje kuvugwa cyane mu gihe urukingo rwa Moderna rwatangiraga gutera imbere.
Yakomeje gushyigikira ubushakashatsi mu buvuzi
Inkunga ye mu buvuzi ntiyarangiriye kuri COVID-19.
Muri 2017, Parton yatanze miliyoni imwe y’amadolari muri Monroe Carell Jr. Children’s Hospital iri muri Vanderbilt, amafaranga agamije gushyigikira ubushakashatsi ku ndwara ya kanseri y’abana. Inkunga yari ifitanye isano n’umuryango we, cyane cyane mwishywa we Hannah wari warigeze kuvurwa kanseri y’amaraso.
Muri 2022, yongeye gutanga miliyoni imwe y’amadolari muri Vanderbilt kugira ngo ashyigikire ubushakashatsi ku ndwara z’ibyorezo zifata abana.
Ibi byatumye ibikorwa bye byo gufasha ubushakashatsi mu buvuzi biba bimwe mu bigize umurage we.
Yafashije abana babarirwa muri za miliyoni kubona ibitabo
Kimwe mu bikorwa bizwi cyane bya Parton ni Dolly Parton’s Imagination Library, gahunda yatangije mu 1995.
Iyi gahunda igamije guha abana bato ibitabo ku buntu buri kwezi, kuva bavutse kugeza ku myaka itanu. Yatangirijwe mu gace Parton yakuriyemo muri Tennessee, nyuma iza kwaguka igera no mu bindi bihugu.
Igitekerezo cyayo cyakomotse ku buzima bwa se wa Parton, wavugaga ko atashoboraga gusoma no kwandika. Parton yashakaga gufasha abana kubona ibitabo hakiri kare no kubashishikariza gukunda gusoma.
Kugeza ubu, iyi gahunda imaze gutanga ibitabo bibarirwa muri miliyoni magana atatu ku bana bo mu bihugu bitandukanye.
Ubushakashatsi butandukanye bwakozwe ku kamaro k’iyi gahunda bwagaragaje ko ishobora kugira uruhare mu kuzamura bimwe mu bipimo by’ubumenyi bwo gusoma no kwandika ku bana bato.
Yagize uruhare mu kubungabunga inyamaswa
Parton kandi yagize uruhare mu kubungabunga inyamaswa. Muri Dollywood, pariki y’imyidagaduro afitanye isano na yo, hashinzwe ahantu hafasha mu kwita kuri bald eagles, inyoni zari mu kaga ko kuzimira muri Leta Zunze Ubumwe za Amerika.
Dollywood yakoranye n’umuryango wa American Eagle Foundation mu kuvura, kurera no gusubiza mu ishyamba izo nyoni. Iyo gahunda yafashije gusubiza amagana y’ibisiga mu gasozi.
Izina Dolly ryageze muri siyansi
Hari n’ikindi gice gitangaje cy’umurage wa Parton gifitanye isano na siyansi. Intama ya mbere y’inyamabere yakorewe cloning ikabyara neza, yavukiye muri Scotland mu 1996, yahawe izina Dolly.
Abashakashatsi bayise iryo zina mu rwego rwo kumwubaha, kuko uturemangingo twakoreshejwe muri cloning twakomowe mu gice cy’umubiri cy’inyamaswa cyari kizwiho kuba gifite uturemangingo twinshi tw’ibinure, maze bahitamo izina rya Dolly Parton.
Ibi byatumye izina ry’uyu muhanzi rihuzwa n’amateka y’ubushakashatsi bw’ingenzi mu bijyanye na cloning.
Umurage we urenze muzika
Nubwo Dolly Parton yari azwi cyane nk’umuhanzi, ibikorwa bye by’ubugiraneza byatumye agira uruhare mu bice byinshi by’ubuzima bwa sosiyete.
Yashyigikiye ubushakashatsi mu buvuzi, afasha abana kubona ibitabo, ashyigikira kubungabunga inyamaswa ndetse akoresha ubwamamare bwe mu gukangurira abantu gushyigikira ibikorwa bifitiye sosiyete akamaro.
Inkunga ye mu bushakashatsi bwa COVID-19 ni kimwe mu bikorwa byatumye izina rye rigera no mu mateka y’ubushakashatsi mu buvuzi.
Vanderbilt ubwayo yemeje ko inkunga ye yagize uruhare mu gushyigikira ubushakashatsi bw’ingenzi bwakozwe kuri iki cyorezo.
Ku bw’ibyo, umurage Dolly Parton yasize ntugarukira ku muziki gusa. Yasize n’ibikorwa by’ubugiraneza byafashije mu bushakashatsi, uburezi, ubuzima rusange no kubungabunga ibidukikije.