Uko Christa Pike wari warakatiwe urwo gupfa yarokotse inshinge ebyiri zari zigamije kumwica

Abamwunganira mu mategeko bavuze ko Pike ari mu bitaro aho ari guhabwa ubufasha bwihutirwa bugamije gukomeza ubuzima bwe, nyuma y’uko ku wa Gatatu yahawe umuti wa pentobarbital inshuro ebyiri, wari ugenewe kumwica ariko ntapfe.

Umwunganizi we, Randy Spivey, yabwiye abanyamakuru ko kugeza ubu nta makuru ahagije bafite ku buryo ubuzima bwa Pike bushobora kumera, ariko ko bazi neza ko akiri muzima.

Pike yakatiwe urwo gupfa mu 1996 azira kugira uruhare mu iyicwa rya Colleen Slemmer wari ufite imyaka 19. Icyo gihe Pike yari afite imyaka 18, akaba yarakoze ubwo bwicanyi ari kumwe n’umukunzi we icyo gihe, Tadaryl Shipp.

Shipp we yakatiwe igifungo cya burundu ashobora kuzarekurwa igihe azaba yujuje ibisabwa, kuko igihe icyaha cyakorwaga yari atarageza ku myaka y’ubukure yemerewe n’amategeko.

Abamwunganira bavuga ko habaye ibibazo bikomeye

Abanyamategeko ba Pike bavuze ko mbere yo kumuha umuti wica, abakozi bashinzwe icyo gikorwa bamaze hafi isaha bagerageza gushyiramo urushinge rw’amaraso.

Spivey yavuze ko yabonye inshinge nibura zirindwi zakoreshejwe mu kuboko kwa Pike kw’ibumoso, ndetse rumwe muri zo rukaba rwaragaragayeho kuba rwaragoramye igihe rwakurwagamo nyuma yo gukoresha.

Umwe mu banyamakuru bari bahari yavuze ko Pike yumvikanye avuga ko ukuboko kwe yumva kugiye guturika kubera ububabare bwatewe n’izo nshinge.

Nyuma yo guhabwa umuti wa pentobarbital inshuro ya kabiri, abari bari kureba iryo yicwa batandukanyijwe na Pike n’umwenda wari ukinze aho yari igiye kwicirwa, kandi abamwunganira bavuga ko icyo gihe byari bimaze kugaragara ko yari agihumeka.

Spivey yavuze ko abari hanze y’uwo mwenda batari bazi ibyarimo kuba cyangwa igihe abaganga batangiye kumufasha.

Guverineri yahagaritse irangizwa ry’ibihano by’urupfu

Nyuma y’ibyabaye, Guverineri wa Tennessee, Bill Lee, yategetse ko hakorwa iperereza ryigenga ku byabaye, ndetse ahagarika irangizwa ry’ibihano byose by’urupfu muri iyo Leta kugeza mu mpera z’uyu mwaka, nk’uko byatangajwe na BBC News.

Lee yavuze ko hari ibibazo byinshi bigomba gusubizwa kandi ko abaturage ba Tennessee bakwiye kumenya neza ibyabaye.

Icyemezo cye kizanagira ingaruka ku iyicwa rya Gary Sutton, wari uteganyijwe kwicwa ku wa 3 Ukuboza.

Minisiteri ya Tennessee ishinzwe amagereza yatangaje ko abakozi bakoze irangizwa ry’igihano bakurikije amabwiriza yashyizweho kandi yemejwe n’Ubushinjacyaha Bukuru bwa Leta.

Iyo minisiteri yavuze kandi ko umuti ukoreshwa mu irangizwa ry’ibihano by’urupfu wari umaze igihe ukora neza, ndetse ko amabwiriza yariho atateganyaga izindi ntambwe zarenza izakozwe kuri uwo munsi.

Abanyamategeko basaba ko Pike ahindurirwa igihano

Abanyamategeko ba Pike ubu basaba ko igihano cyo kwicwa gihindurwa, agakatirwa igifungo aho kwicwa.

Bavuze ko ibyo Pike yanyuzemo byamuteye ububabare budakenewe, ndetse ko barimo no kureba izindi nzira z’amategeko bashobora gukoresha.

Stephen Ferrell, umwe mu banyamategeko be, yavuze ko bashaka kubanza kureba niba Pike yakira neza kandi akagira uruhare mu gufata ibyemezo birebana n’ibizakurikiraho.

Iri geragezwa ryo kwica Pike ni irya kabiri muri Tennessee muri uyu mwaka ritagenze uko byari biteganyijwe. Muri Gicurasi, irangizwa ry’igihano cya Tony Carruthers ryahagaritswe nyuma y’uko abakozi bananiwe kubona umutsi w’amaraso wo guteramo umuti wica, bituma ahabwa umwaka mbere yo kongera gusuzumwa ngo yicwe.