Uko ‘beat’ yirengagijwe n’abahanzi yabaye intandaro ya ‘Kibasumba’ ya Ish Kevin na Bushali –VIDEO

Uyu munsi, “Kibasumba” iri mu ndirimbo ziri guhabwa umwanya ukomeye mu mushinga wa album +250, ariko inyuma yayo hari inkuru y’imyaka ibiri yuzuyemo gushidikanya, guhitamo bikomeye, ndetse n’igitangaza cy’uko ‘beat’ imwe yanze gufatwa n’abahanzi hafi ya bose, ariko ikaza guhindura amateka.

Beat yanzwe… ariko iza guhindura byose

Mu kiganiro na InyaRwanda, Producer Barrick yavuze ko urugendo rwa “Kibasumba” rwatangiriye kuri Producer Nganji wo muri Green Ferry, wari warakoze ‘beat’ itaruzura neza. Ni we wayohereje ku bandi ba Producers ngo bayongeremo ibitekerezo.

Barrick avuga ko ubwo yayibonaga, yahawe amahirwe yo kuyikoraho mu ijoro rimwe, ayongeramo gitari, piano n’ibindi bikoresho by’ingenzi, kugeza ubwo yumvaga ko yamaze gufata isura yayo ya nyuma.

Ariko igitangaje cyaje nyuma: ubwo abahanzi umunani bazengurukaga muri studio zitandukanye bari gutoranya ‘beats’ z’indirimbo za album +250, iyi “beat” ya “Kibasumba” ntiyigeze itoranywa n’umwe muri bo.

Barrick at: “Twumvaga ko hari umuhanzi uzayifata, ariko mu gitondo, ku manywa, kugeza mu masaha ya nyuma, nta n’umwe wayihisemo.”

Ish Kevin aza mu ijoro… ahindura amateka

Mu gihe abandi bahanzi bari bamaze gutangira gufata izindi beats, Ish Kevin we yaje atinze kubera izindi gahunda.

Ageze muri studio, asanga abandi bari bamaze gutangira akazi. Ntiyazuyaje. Yazengurutse studio zose, ageze aho Barrick yakoreraga ahita avuga ati: “Iyi beat muyimpe”

Barrick abigereranya n’imvugo izwi cyane agira ati: “Ni nka rya buye ryanzwe n’abubatsi.”

Icyo gihe, Producer Nganji na Barrick bari bafite igitekerezo cy’uko iyi beat ishobora no kuba ijyanye neza na Ish Kevin, nubwo yari itaratunganywa mu buryo bwa nyuma.

Bushali yinjiye mu nkuru itari yateguwe

Nyuma yo guhitamo beat, hagombaga gushakwa undi muhanzi uzafatanya na Ish Kevin. Icyo gihe nibwo hatangiye igitekerezo cyo guhuza Ish Kevin na Bushali.

Nubwo Bushali atahise ayiyumvamo ako kanya, nyuma yo kumva amagambo n’imiterere y’indirimbo, yarayikunze, bituma bombi batangira kuyikoraho.

Barrick avuga ko kubona aba bombi bahurira muri iyi ndirimbo byari nko gutera intambwe nshya, kuko ari ubwa mbere bakoranye ku mushinga umwe.

Uko indirimbo yagiye yiyubaka buhoro buhoro

Nyuma y’ijwi rya Ish Kevin na Bushali, umushinga wakomeje kunozwa. Producer Roark Bailey wo muri Amerika, uzwi mu gukora imishinga ikomeye, ni we waje gukora mixing ya album +250.

Ageze kuri “Kibasumba”, yasabye ko hari ibindi byongerwamo kugira ngo ijwi rirusheho kugira imbaraga. Nibwo hiyongereyeho amajwi ya Ice Nova mu background, ndetse n’amashyi yongerera indirimbo ubuzima.

Indirimbo imaze imyaka ibiri ivuka

Barrick avuga ko “Kibasumba” atari indirimbo yakozwe mu buryo bwihuse. Yatangiye mu 2024, inyura mu ntambwe nyinshi z’iterambere, kugeza ubwo isohokeye mu mushinga wa +250 mu 2025–2026.

Ati: “Imwe mu ndirimbo zagiye zitinda cyane ni Kibasumba. Yafashe hafi imyaka ibiri kugira ngo ibe uko yumvikana ubu. Ariko ni Album yose muri rusange.”

+250: Album yubatse mu buryo budasanzwe

Album +250 ubwayo ni umushinga munini wahurije hamwe abahanzi n’abatunganya umuziki benshi, ukorwa ku bufatanye na Pan African Music.

Iyi album yatangiye ari nka filime mbarankuru yibanda kuri kinyatrap, ariko iza guhinduka umushinga munini w’indirimbo zafashwe hagati ya 2024 na 2025, ahantu hatandukanye harimo Mundi Center yahinduwe studio y’agateganyo.

Abategura uyu mushinga bavuga ko bahuje abahanzi n’abaproducer barenga 16, bagamije kugaragaza uburyo Hip Hop nyarwanda ifite impano zidasanzwe n’icyerekezo gishya.

Inkuru ya “Kibasumba” igaragaza ko mu muziki, rimwe na rimwe indirimbo ziba zitabonywe n’abantu benshi, ariko zikazahindura amateka bitewe n’umuntu umwe uyibonye mu buryo butandukanye.

Ni inkuru y’uko ibitarajyaga bigaragara nk’idasanzwe bishobora guhinduka igitangaza, iyo byahuye n’icyerekezo gikwiye, mu gihe gikwiye.

“Kibasumba” si indirimbo gusa; ni urugero rw’uko mu muziki, ibintu byanzwe na benshi bishobora kuba aribyo byubaka amateka.

Producer Barrick avuga ko “Kibasumba” yatangiye ari 'beat' yahawe n’abahanzi umunani ariko ntiyatoranyijwe n’umwe, kugeza ubwo Ish Kevin ayihisemo mu ijoro ry’ikorwa rya album +250, igahinduka imwe mu ndirimbo z’ingenzi z’umushinga

Bushali avuga ko atahise yumva “Kibasumba” ako kanya, ariko nyuma yo gusobanukirwa n’amagambo n’imiterere yayo, yemeye kuyikorana na Ish Kevin, bituma ihinduka indirimbo ihuriweho mu mushinga wa +250

Ish Kevin ni we wahisemo 'beat' ya “Kibasumba” ubwo abandi bahanzi bari bayirengagije, aho yageze muri studio atinze agahita ayisaba, bikaza kuyibyara indirimbo iri mu zikunzwe muri album +250.

KANDA HANO UBASHE KUREBA IKIGANIRO TWAGIRANYE NA BARRICK

KANDA HANO UREBE INDIRIMBO ‘KIBASUMBA’ YA ISH KEVIN NA BUSHALI