Uganda: Iserukiramuco ryarimo Kenny Sol, Chameleone, Niyo Bosco n'abandi ryasubitswe ku munota wa nyuma

Iki gitaramo cyari giteganyijwe kubera kuri Lugogo Cricket Oval kuri uyu wa Gatandatu tariki 26 Nyakanga 2025. Ku rutonde rw’abagombaga kukigaragaramo harimo ibyamamare nka Jose Chameleone, Ykee Benda, Ava Peace ndetse na Dax Vibez bo muri Uganda.

Ku ruhande rw’u Rwanda, hari hategerejwe Marina, Kenny Sol, Calvin Mbanda na Niyo Bosco, bari biteguye guhaguruka i Kigali kuri uyu wa Gatanu tariki 25 Nyakanga 2025.

Nubwo impamvu nyamukuru y’iseswa ry’iki gitaramo itatangajwe ku mugaragaro, amakuru InyaRwanda yabonye agaragaza cyasubitswe kubera imyiteguro idahagije, cyane cyane mu bijyanye no kwamamaza iki gitaramo.

Ibi ngo byateye impungenge abategura igitaramo ko gishobora kutitabirwa nk’uko babyifuzaga. Umwe mu bafashaga KPK gutegura iki gitaramo, yabwiye InyaRwanda, ko gusubika iki gitaramo byaturutse ku ruhande “rw’abo muri Uganda.”

Byongeye, hari n’abandi bahanzi bari batangajwe mbere nk’abagombaga kwitabira ariko baza gukurwamo ku rutonde, barimo Christopher na Juno Kizigenza, ngo kuko batari buboneke ku itariki cyari giteganyijwe.

Juno Kizigenza yasubitse kwitabira iki gitaramo, n’aho Christopher Muneza abisubika kubera gahunda yari afite muri Leta Zunze Ubumwe za Amerika.

Abari bamaze kugura amatike bagiriwe inama yo kuguma ku itike zabo mu gihe hategerejwe andi makuru mashya ku isubikwa n’itariki nshya y’igitaramo.

Igitaramo Uganda-Rwanda Music Festival cyari cyitezweho guhuza ibyamamare by’ibihugu byombi, cyasubitswe bitunguranye