Uganda irashaka gukina n’Amavubi

Ibi iyi kipe y’igihugu yabyerekanye binyuze ku rukuta rwayo rwa X . Uganda yashyizeho abakinnyi yahamagaye izakoresha ku mikino ibiri na Botswana ndetse n'abo Amavubi yahamagaye ku mikino na Mali mu gushaka itike y’igikombe cya Afurika cya 2026.

Yerekanye ko umukino wa Uganda n’Amavubi birenze kuba umukino wo mu kibuga gusa ahubwo ko ari ishema ry’ibihugu byombi. Yahise ibaza abafana niba hadakenewe kubona uku guhangana mu kibuga. Yanababajije niba umukino wa gicuti wahuza Uganda na Rwanda wakinirwa kuri Hoima City Stadium cyangwa kuri Stade Amahoro.

Yanasabye kandi abakunzi b’umupira w’amaguru gutanga ibisubizo ku kuba uyu mukino waba cyangwa ntube binyuze ahatangirwa ibitekerezo.

Ikipe y’Igihugu y’u Rwanda iheruka gukina n’iya Uganda mu 2021 mu mikino yo gushaka itike y’Igikombe cy’Isi cya 2022. Iyo mikino yose Uganda yarayitsinze.