Iki gitaramo cyari cyateguwe ku wa 5 Kamena 2026 kuri Cricket Oval muri Kampala, cyari kimwe mu bikorwa byo kwizihiza imyaka 10 ishize Comedy Store itangiye ibikorwa byayo byo gusetsa no gutegura ibitaramo bikomeye muri Uganda.
Mu itangazo ryashyizwe hanze mu ijoro ryo kuri uyu wa Gatanu tariki 29 Gicurasi 2026, abategura iki gitaramo bavuze ko iki cyemezo cyafashwe nyuma y’inama n’ubujyanama bagiranye n’inzego z’ubuzima zirimo Minisiteri y’Ubuzima muri Uganda.
Bagize bati: “Nyuma yo kugisha inama inzego z’ubuzima, twafashe icyemezo cyo gusubika ibirori byo kwizihiza imyaka 10 ya Comedy Store byari biteganyijwe tariki 5 Kamena kuri Cricket Oval.”
Bakomeje bavuga ko icy’ingenzi kuri bo ari ugushyira imbere ubuzima n’umutekano w’abafana, abahanzi, abakozi ndetse n’abaturage muri rusange muri ibi bihe igihugu gihanganye n’icyorezo cya Ebola.
Abategura iki gitaramo bavuze ko indi tariki kizaberaho izatangazwa mu gihe cya vuba nibamara kuyemezanya n’inzego bireba.
Banihanganishije abafana bari bamaze kwitegura kwitabira iki gitaramo, basaba abantu gukomeza kwirinda, kwirinda amakoraniro manini no gukomeza kugira isuku y’intoki nk’uko amabwiriza y’ubuzima abiteganya.
Gutangaza ko The Ben na Diamond Platnumz bagombaga guhurira muri iki gitaramo byari byazamuye amarangamutima y’abakunzi b’umuziki muri aka karere, cyane cyane ko aba bahanzi bombi bafite igikundiro gikomeye muri Uganda no muri Afurika y’Iburasirazuba muri rusange.
Kwamamaza kwa mbere kw’iki gitaramo kwari kwanatumye benshi batangira kugura amatike kare bitewe n’uburyo cyari cyitezweho kuba amateka mu myidagaduro ya Kampala.
The Ben na Diamond bamenyeshejwe ko igitaramo bari guhuriramo muri Uganda cyasubitswe
