Ejo ku wa Kabiri ni bwo ikipe ya Real Madrid
yatsinze Benfica igitego 1-0 mu mukino ubanza wa kamarampaka uzatanga ikipe
yerekeza muri 1/8 cya UEFA Champions League ya 2025/2026.
Ubwo umukino wari ugeze ku munota wa 50, Vinicius
arimo arishimira iki gitego yatsinze, yavuze ko yabwiwe amagambo akomeretsa
n’umukinnyi wa Benfica, Gianluca Prestianni. Yahise ajya ku musifuzi amubwira
ko uyu mukinnyi amukoreye irondaruhu amubwira ko ari inkende.
Vinicius yashatse kwanga gusubira mu kibuga dore ko
umukino wamaze hafi iminota 10 wahagaze ndetse umusifuzi yakoze ikimenyetso
kirwanya irondaruhu ariko ntiyatanga ikarita cyangwa ngo agire indi myanzuro
afata bitewe n’uko nta bimenyetso bifatika yari afite ko byabayeho koko.
Gianluca Prestianni w'imyaka 20 mu butumwa yatanze
binyuze ku mbuga nkoranyambaga yarabihakanye ahubwo avuga ko abakinnyi ba Real
Madrid bamukoreye irondaruhu. Kuri ubu Impuzamashyirahamwe y’umupira w’amaguru
ku mugabane w’Iburayi, UEFA, yinjiye muri iki kibazo.
UEFA yavuze ko raporo y’abasifuzi yavuye muri uyu mukino irimo irarebwaho. Yavuze ko ahari ibibazo hose harimo hararebwaho ndetse ibihano bikaba bishobora gutangwa.
Usibye kuba Vinicius avuga ko yakorewe irondaruhu n’umukinnyi ariko yanatewe amacupa y’amazi n’abafana. Amabwiriza ya UEFA avuga ko iyo umukinnyi akoreye mugenzi we irondaruhu ahanishwa gusiba nibura imikino 10 ndetse n'ikipe ye igafatirwa ibihano.
Mbappe ukinana na Vinicius muri Real Madrid yavuze ko yiyumviye Gianluca Prestianni yita Vinicius inkende ndetse ngo yabivuze inshuro zirenga eshanu. Yavuze ko Gianluca akwiye guhanishwa guhagarikwa burundu gukina imikino ya UEFA Champions League.
UEFA yinjiye mu kibazo Vinicius uvuga ko Gianluca Prestianni yamututse ko ari inkende