Kuri uyu wa Kabiri ni bwo hatangiye gukinwa imikino yo kwishyura ya 1/8 cya UEFA Champions League 2025/2026. Umukino wari uhanzwe amaso wari kuri Etihad aho Manchester City yari yakiriye Real Madrid yari yarayitsinze 3-0 mu mukino ubanza.
Ku munota wa mbere Real Madrid yashoboraga guhita ifungura amazamu ku makosa yakozwe na Khusanov yihera umupira Valverde imbere y’izamu ariko nawe uhita umucika.
Iminota yakurikiyeho Manchester City yacanye umuriro imbere y’izamu abarimo Rodri barekura amashoti ariko umunyezamu wa Real Madrid aratabara.
Ku munota wa 17 Vinicius yarekuye ishoti ryaganaga mu izamu, Bernado Silva arikuzamo ukuboko bituma ahabwa ikarita y’umutuku ndetse hanatangwa penariti.
Iyi penariti n’ubundi yatewe na Vinicius ayishyira mu nshundura igitego cya mbere cya Real Madrid kiba kirabonetse.
Nubwo Manchester City yari isigaranye abakinnyi 10 mu kibuga ariko ntabwo yacitse intege ubundi ku munota wa 41 Erling Haaland atsinda igitego cyo kwishyura.
Mu gice cya kabiri Pep Guardiola yakoze impinduka mu kibuga ngo arebe ko yashaka ibindi bitego ariko birangira ku munota wa 90+4 Vinicius atsinze igitego cya kabiri ahawe umupira na Tchouameni.
Umukono warangiye Real Madrid itsinze ibitego 2-1 iba isezereye Manchester City ku giteranyo cy’ibitego 5-1.
Mu yindi mikino yakinwe, Sporting CP yasubiranye inyuma Bodoe/Glimt iyitsinda ibitego 5-0 ihita iyisezerera ku giteranyo cy’ibitego 5-3.
Arsenal ibifashijwemo na Eberechi Eze na Declan Rice yatsinze Bayer Leverkusen 2-0 ihita inayisezerera ku giteranyo cy’ibitego 3-1.
Ni mu gihe kandi Paris Saint-Germain yongeye kwihaniza Chelsea iyitsinda ibitego 3-0 ihita inayisezerera ku giteranyo cy’ibitego 8-2.
Imikino ya UEFA Champions League ya 1/8 yo kwishyura irakomeza kuri uyu wa Gatatu aho FC Barcelona izakina na Newcastle United, Bayern Munich ikine na Atalanta, Liverpool ikine ba Galatasary naho Tottenham Hostpur ikine na Atletico Madrid.
Arsenal yerekeje muri 1/4 cya UEFA Champions League isezereye Bayer Leverkusen 
Real Madrid yasezereye Manchester City yerekeza muri 1/4 cya UEFA Champions League