Kuri uyu wa Gatatu ni bwo imikino ihuza amakipe yabaye aya mbere iwayo ku mugabane w’Iburayi ya UEFA Champions League 2025 yo ku munsi wa kabiri yari yakomeje. Umukino wari utegerejwe na benshi ni uwo FC Barcelona yakiriyemo Paris Saint-Germain kuri Estadio Olimpico Lluis Companys.
FC Barcelona yawutangiranye imbaraga nyinshi cyane cyane binyuze kuri Lamine Yamal ndetse iza gufungura amazamu mbere ku gitego cya Ferran Torres ku munota wa 19 ahawe umupira na Marcus Rashford, ubundi ba myugariro ba PSG bagira ngo yaraririye umupira awushyira mu nshundura.
Paris Saint-Germain nyuma yo gutsindwa yakomeje gukina ubona nta gitutu iriho ku munota wa 38 iza kwishyura ku kazi gakomeye kakozwe na Nuno Mendes azamukana umupira acenga, awuha Senny Mayulu nawe acenga ba myugariro arekura ishoti rijya mu izamu.
FC Barcelona yagiye yongera kwiharira umupira ndetse igasatira cyane ariko ba myugariro ba PSG bagakora akazi kabo.
Paris Saint-Germain itari yabonye uburyo bwinshi yaje kububona ku munota wa 90 ku mupira Achraf Hakim yahinduriye Goncalo Ramos winjiye mu kibuga asimbuye ahita atsinda igitego cya kabiri. Umukino warangiye FC Barcelona itsinzwe na PSG ibitego 2-1.
Manchester City yari yasuye AS Monaco mu Bufaransa yatunguranye inganya nayo ibitego 2-2, Arsenal ibifashijwemo na Gabriel Martinelli na Bukayo Saka itsinda Olympiacos ibitego 2-0, Newcastle United inyagira Union St.Gilloise ibitego 4-0 naho Qarabag FK itsinda FC Copenhagen 2-0.
Bayer Leverkusen yanganyije na PSV Eindhoven 1-1, Borussia Dortumund inyagira Athletic Club 4-1, Napoli itsinda Sporting CP 2-1 naho Villarreal inganya na Jeventus 2-2.
Nyuma y’iminsi ibiri imaze gukinwa, FC Bayern Munich iri ku mwanya wa mbere, Real Madrid ku mwanya wa kabiri, PSG ku wa gatatu, Inter ku wa kane naho Arsenal ikaba ku wa Gatanu aho zose zifite amanota atandatu.
Goncalo Ramos yishimira igitego gitanga intsinzi yatsinze
PSG yatsinze FC Barcelona ibitego 2-1