Amasomo atatu akomeye asizwe n'imikino ya UEFA Champions League, ni aya akurikira.
1. Nta kipe izapfa guhagarika Manchester City?
Manchester City yageze muri kimwe cya Kane isezereye FC Copenhagen yo muri Denmark ku giteranyo cy'ibitego bitandatu kuri kimwe.
Buri mukino Manchester City yagiye itsinda ibitego bitatu kuri kimwe, haba muri Denmark no mu Bwongereza. Umukino wabereye mu Bwongereza, Man City yatsinze kuri Serivisi za Manuel Akanji, Julian Alvarez na Erling Haaland.
Mu myaka 31 itambutse, Real Madrid yo muri Espagne niyo yonyine yatwaye UEFA Champions League inshuro zirenze imwe yikurikiranya. Ukurikije uko Manchester City iri kugaragaza imbaraga zidasanzwe, ishobora kwiyunga kuri Real Madrid, igatwara iki gikombe yikurikiranya mu myaka 32.
Manchester City itozwa na Pep Gualdiola, ikimara gutsinda FC Copenhagen, yahise ikora agahigo ko kuba ikipe ya mbere ibashije gutsinda imikino Icyenda yikurikiranya mu rugo, ariko iyo mikino ikajya itsinda nibura ibitego bitatu kuzamura.
Manchester City, irabura imikino Icyenda ngo ikureho agahigo ka FC Barcelona ko kumara imikino myinshi idatsindirwa imbere y'abafana bayo muri UEFA Champions League .
Kugeza ubu, Man City ya Pep Gualdiola, imaze kuzuza imikino 30 yikurikiranya idatsindirwa ku kibuga cyayo muri UEFA Champions League.
FC Barcelona, nayo yatojwe na Pep Gualdiola, niyo yihariye agahigo ko gukina imikino 38 idatsindirwa imbere y'abafana bayo muri UEFA Champions League. Ibi FC Barcelona yabikoze hagati ya 2013-2020.
Muri iyo mikino 30 Manchester City imaze kwitwara neza kuri Etihad Stadium, yanganyijemo ibiri gusa, indi mikino 28 irayitsinda.
Manchester City iraca amarenga yo kwisubiza UEFA Champions League
2. Paris Saint-Germain nitandukana na Mbappe izasigara ntaho ihagaze
Paris Saint-Germain nubwo yageze muri kimwe cya Kane isezereye Real Socedad ku giteranyo cy'ibitego bine kuri kimwe, byagaragaye ko iyo iba idafite Umufaransa Kylian Mbappe itari kugera kuri uyu musaruro.
Umwuka ntabwo ari mwiza hagati ya Kylian Mbappe n'umutoza wa Paris Saint-Germain Luis Enrique, kubera ko atakimuha umwanya uhagije wo gufasha PSG muri Shampiyoyona ya League 1.
Kylian Mbappe yagobotse Paris Saint-Germain muri UEFA Champions League aho itabasha kwikura itamufite. Bisobanuye ko kugira ngo Paris Saint-Germain ikomeze muri kimwe cya Kane, ari uruhare rwa Mbappe watsinze ibitego bitatu muri bine yatumye iyi kipe ikomeza.
Bivuze ko PSG iyo itaza kugira Kylian Mbappe, imikino ibiri yari yari kurangira amakipe yombi anganya igitego kimwe kuri kimwe, kuko undi mukinnyi wafashije PSG gutsinda, ni Bradley Barcola watsinze kimwe mu mukino ubanza.
Kylian Mbappe yamaze kubwira ubuyobizi bwa Paris Saint-Germain ko azatandukana nayo mu mpeshyi, akajya mu yandi amakipe amushaka atarimo PSG akinira.
Bisobanuye ko Mbappe naramuka avuye I Paris, Paris Saint-Germain nitaramuka ishatse undi rutahizamu ukomeye, izaza igorwa cyane no kubona intsinzi.
Muri UEFA Champions League, Paris Saint-Germain yagaragaje ko itabaho nta Kylian Mbappe
3. Bayern Munich yagaragaje ko itari yaba ikipe yo kurindimuka
FC Bayern Munich yo mu Budage, yagaragaje ko itari yaba ikipe yo kurindimuka, nyuma y'uko yari imaze gukina imikino itanu ikaba yari yarabonyemo intsinzi imwe gusa.
Muri iyo mikino itanu ya vuba yagaragaje umusaruro mubi wa Bayern Munich, harimo itatu yikurikiranya iyi kipe yatsinzwe, neza neza benshi bakavuga ko yarangiye.
Ntawari witeze ko Bayern Munich izasezerera Lazio ku ntsinzi y'ibitego bitatu ku busa.
Umukino wa mbere Bayern Munich yari yakiniye i Roma kwa Lazio, wari warangiye Lazio itsinze Bayern Munich igitego kimwe ku busa.
Umukino wa kabiri wo kwishyura, Bayern Munich ibifashijwemo na Harry Kane watsinze ibitego bibiri, na Thomas Muller, yatsinze ibitego bitatu ku busa.
Intsinzi ya Bayern Munich, yagaruye icyizere mu bafana, bari baratangiye kugitakaza bumva ko muri uyu mwaka nta gikombe ishobora gutwara.
Mu Budage, Bayern Munich isa naho yamaze gukura amaso ku gikombe cya Shampiyoyona, kuko irushwa amanota 10 na Bayer Leverkusen iri ku mwanya wa mbere.
Bisibanuye ko Bayern Munich igifite amahirwe yo kwegukana UEFA Champions League, gusa ifite umusozi wo kuzamuka, kuko haracyarimo amakipe akomeye nka Real Madrid, Man City, PSG, ndetse n'andi amakipe umunani, azishakamo ane ajya muri kimwe cya Kane mu cyumweru gitaha.
Bayern Munich yongeye kurema agatima abafana bayo, igaragaza ko uyu mwaka ishobora gutwara UEFA Champions League