Kuri uyu wa Kabiri ndetse n’ejo ku wa Gatatu saa Tatu z’ijoro harakinwa imikino yo kwishyura ya 1/4 cya UEFA Champions League 2025/2026.
Uyu munsi kuri Civitas Metropolitano, Atletico Madrid yatsinze umukino ubanza ibitego 2-0 irakira FC Barcelona. Lamine Yamal yiyemeje gukora ibishoboka byose bagasezerera Atletico Madrid.
Ejo mu kiganiro n’itangazamakuru, Lamine Yamal yavuze ko bizeye gusezerera Atletico Madrid ndetse ko bitabasaba gukora ibitangaza.
Ikipe ya Atletico Madrid ntabwo iratsindirwa mu rugo mu mikino 10 iheruka yo ku mugabane w’Iburayi ikina n’amakipe nayo akomoka muri Espagne.
Ni mu gihe FC Barcelona yo mu mikino 11 iheruka yo ku mugabane w’Iburayi ikina n’amakipe yo muri Espagne iri hanze yatsinzemo umwe gusa.
Kuri uyu wa Kabiri kandi Liverpool yatsinzwe umukino ubanza ibitego 2-0 irakira Paris Saint-Germain kuri Anfield. Aya makipe n’ubundi yaherukaga guhurira kuri iki kibuga cya Liverpool muri Champions League mu mwaka ushize bikaba byararangiye PSG iyisezereye kuri penariti yerekeza muri 1/4.
Ejo ku wa Gatatu Saa Tatu z’ijoro imikino ya 1/4 yo kwishyura ya UEFA Champions League izakomeza aho Real Madrid ifite akazi ko kuzasura FC Bayern Munich mu Budage ikayitsindirayo nibura ibitego 2-0 kugira ngo ikomeze muri 1/2. Ni nyuma y’uko mu mukino ubanza FC Bayern Munich yatsinze ibitego 2-1.
Ni mu gihe kandi kuri Emirates Arsenal isa nk'iyasoje akazi kayo izakira Sporting. Mu mukino ubanza yatsindiye muri Portugal 1-0.
FC Barcelona irasabwa kuva inyuma igasezerera Atletico Madrid