Kuri uyu wa Kabiri saa Tatu z’ijoro ni bwo hakinwe imikino yo kwishyura ya 1/4 cya UEFA Champions League. Umukino wari utegerejwe na benshi wari kuri Civitas Metropolitano aho Atletico Madrid yari yakiriye FC Barcelona.
Uyu mukino watangiye wihuta cyane ku mpande zombi, ubundi ku munota wa 4 gusa Lamine Yamal afungura amazamu ku makosa yakozwe na ba myugariro ba Atletico Madrid bihera umupira Ferran Torres nawe ahita awumuha awushyira mu nshundura.
Nyuma yo gutsindwa, Atletico Madrid nayo yagiye ibona uburyo imbere y’izamu binyuze ku ruhande rwa Ademola Lookman. Hari aho uyu mukinnyi yahinduye umupira mwiza imbere y’izamu usanga Antoine Griezman agiye kuwushyira mu izamu ariko ba myugariro ba FC Barcelona baratabara.
Ku munota wa 24 Ferran Torres yatsinze igitego cya kabiri ahawe umupira na Dani Olmo. Ku munota wa 31 Ademola Lookman nawe yahise atsindira Atletico Madrid igitego cya mbere ahawe umupira na Marcos Llorente.
Mbere y’uko igice cya mbere kirangira, FC Barcelona yashatse igitego cya gatatu ndetse ikabona imipira y’imiterekano bivuye ku makosa yakorwaga n’abakinnyi ba Atletico Madrid ariko kuyibyaza umusaruro bikaba ikibazo.
Mu gice cya kabiri nabwo FC Barcelona yaje isatira ndetse ku munota wa 55 Ferran Torres yatsinze igitego ariko kiza kwangwa bitewe n’uko yari yaraririye.
Ku munota wa 79 myugariro wa FC Barcelona, Eric Garcia yabonye ikarita y’umutuku bigabanya imbaraga yari ifite, umukino urangira itsinze ibitego 2-1. Atletico Madrid yahise ikomeza muri 1/2 ku giteranyo cy’ibitego 3-2 kuko umukino ubanza yari yatsinze 2-0.
Undi mukino wakinwe, imbere y’abafana bayo Liverpool yatsinzwe na Paris Saint-Germain ibitego 2-0 bya Ousmane Dembele. Iyi kipe yo mu Bufaransa yahise inayisezerera yerekeza muri 1/2 ku giteranyo cy’ibitego 4-0.
Imikino yo kwishyura ya 1/4 cya UEFA Champions League irakomeza kuri uyu wa Gatatu aho FC Bayern Munich izakira Real Madrid naho Arsenal yakire Sporting.
Lamine Yamal yishimira igitego yatsinze nubwo byarangiye basezerewe
Atletico Madrid yerekeje muri 1/2 cya UEFA Champions League
FC Barcelona yasezerewe muri Champions League