Aston Villa yatsinze Club
Brugge ibitego 3-2, Borussia Dortmund itsinda Villarreal ku bitego nk’ibi, mu
gihe Real Betis nayo yatsinze Lille ibitego 3-2.
Andi makipe 12 yatangiye
urugendo rwayo muri iri rushanwa ku wa Gatatu, arimo Barcelona, Arsenal na
Paris Saint-Germain, mu gihe andi 12 asoza imikino y’icyiciro cya shampiyona
azakina ku wa Kane.
Muri iki cyiciro, amakipe 36 yose azakina imikino umunani. Hifashishijwe agaciro k’abakinnyi ku isoko kakozwe na Transfermarkt, hari amakipe afite ingengabihe yoroshye ndetse n’afite gukina imikino ikomeye kurusha andi.
Stuttgart ifite imikino
yoroshye kurusha andi makipe
Stuttgart ni yo kipe
ifite ingengabihe yoroshye kurusha izindi muri Champions League 2026/27,
hashingiwe ku gaciro k’amakipe umunani izahura nayo.
Amakipe Stuttgart izakina
nayo afite agaciro k’abakinnyi bose hamwe ka miliyari 2.6 z’ama-Euro, bikaba
bituma iba ku mwanya wa mbere mu kugira imikino yoroshye.
Stuttgart yatangira
urugendo rwayo itsinda 3-1 Viking FC, ikipe iri mu zifite abakinnyi bafite
agaciro gake muri iri rushanwa, aho agaciro k’abakinnyi bayo kagereranywa kuri
miliyoni 43.7 z’ama-Euro.
Liverpool ni yo
ikurikiraho ku rutonde rw’amakipe afite ingengabihe yoroshye. Amakipe umunani
izahura nayo afite agaciro k’abakinnyi bose hamwe ka miliyari 2.9 z’ama-Euro.
Nubwo ifite iyi
ngengabihe, umukino Liverpool yatangiye ikina na Atlético Madrid ni wo wari
ukomeye kurusha indi, hashingiwe ku gaciro k’abakinnyi b’amakipe yombi, waje
kurangira Liverpool itsinze 2-1.
Borussia Dortmund, Bayern Munich na Real Madrid nazo ziri mu makipe 10 afite ingengabihe yoroshye kurusha ayandi muri iki cyiciro cya Champions League.
RB Leipzig ifite
ingengabihe ikomeye kurusha izindi
Ku rundi ruhande, RB
Leipzig ni yo ifite urugendo rutoroshye kurusha andi makipe mu rugamba rwo
gushaka kugera mu mikino ikurikiyeho.
Amakipe umunani Leipzig
izahura nayo afite agaciro k’abakinnyi bose hamwe ka miliyari 5.2 z’ama-Euro,
bikaba ari byo biyishyira ku mwanya wa mbere mu kugira ingengabihe ikomeye.
AEK Athens na Paris
Saint-Germain, ari na yo ifite igikombe cya Champions League giheruka,
basangiye umwanya wa kabiri, aho amakipe bazahura nayo afite agaciro kose ka
miliyari 5.1 z’ama-Euro.
Barcelona yo iri ku
mwanya wa gatandatu ku rutonde rw’amakipe afite ingengabihe ikomeye.
Manchester City ni yo
kipe yonyine yo mu Bwongereza iri mu makipe 10 afite ingengabihe ikomeye
kurusha ayandi. Amakipe umunani izahura nayo afite agaciro k’abakinnyi bose
hamwe ka miliyari 4.7 z’ama-Euro.
Manchester City yatangiye
urugendo rwayo muri Champions League itsinda FC Porto ibitego 2-0.