UCL 2026/27: Havutse impaka hagati y’umufana n’abakinnyi nyuma y’uko Manchester United inyagiye Sabah 4-0

Manchester United yagarutse muri Champions League itsinda Sabah ikinamo Umunyarwanda Joy-Lance Mickels yo muri Azerbaijan ibitego 4-0. Ibitego bya Matheus Cunha, Bruno Fernandes, Benjamin Šeško na Lisandro Martínez byafashije ikipe ya Michael Carrick kubona intsinzi yoroshye.

Nyuma y’umukino ariko, habaye akajagari gato ubwo abakinnyi bari bagiye gutaha kuri bisi yabategereje hanze ya Old Trafford.

Fletcher, usanzwe ari umutoza w’ikipe ya Manchester United y’abatarengeje imyaka 18, yagaragaye ahanganye mu magambo n’umufana wari hafi ya bisi y’ikipe nkuru.

Mu mashusho yakwirakwiye, Fletcher yumvikanye abwira uwo mufana ati: “Umva, ntacyo bitwaye, ariko ntushobora kuvuga gutyo. Garagaza icyubahiro. Ni abantu nkawe batuma abakinnyi batongera gusinya.”

Byakekwaga ko impaka zatangiye nyuma y’uko bamwe mu bakinnyi ba Manchester United batigeze bahagarara ngo basinyire abafana bari babategereje. Uwo mufana yakomeje kwinubira icyo cyemezo, ariko ntibyasobanutse neza amagambo yaba yaravuze yabanje guteza Fletcher kumubuza kuvuga nabi.

Abandi bafana bari aho bahise bashima Fletcher kuba yavuganiye abakinnyi, ndetse banatangira kuririmba izina rye.

Manchester United igiye guhura na Manchester City

Ku kibuga, Michael Carrick yishimiye kubona Benjamin Šeško atsinda igitego mu mukino wa kabiri wikurikiranya kuva agarutse nyuma y’imvune.

Nubwo Šeško ari mu bihe byiza, Carrick ntiyigeze atangaza niba uyu rutahizamu ukomoka muri Slovenia azatangira mu kibuga mu mukino wa Premier League Manchester United izakiramo Manchester City ku Cyumweru.

Kugeza ubu, Matheus Cunha ni we ukunze gutangira ku mwanya wa rutahizamu, mu gihe Marcus Rashford na Patrick Dorgu bakina ku ruhande rw’ibumoso rw’ubusatirizi.

Nk'uko tubikesha talkSPORT, Carrick yavuze ko guhitamo abakinnyi bazatangira uwo mukino atari ibintu byoroshye, ariko ko ashimishwa no kuba afite abakinnyi benshi bashobora gutsinda ibitego kandi bari kwitwara neza.

Ati: “Ntabwo ari icyemezo cyoroshye, birumvikana ko atari cyo. Ariko ni ikibazo nakwishimira kugira abakinnyi bashobora gutsinda ibitego kandi bose bakaba bari kwitwara neza.”

Yakomeje avuga ko abakinnyi bose basobanukiwe ko hari igihe umwe azatangira umukino, ubundi akazawinjiramo nyuma, bitewe n’uko umukino wagenze.

Carrick ati: “Ni ibintu dukeneye muri iyi kipe mu mikino itandukanye y’uyu mwaka, kugira ngo tubashe gukoresha abakinnyi bafite ubushobozi butandukanye mu bihe bitandukanye.”

Yasoje ashimira abakinnyi be ati: “Ni byiza cyane kuba bose bari mu bihe byiza kandi bakaba baratangiye neza.”

Intsinzi ya Manchester United kuri Sabah yagaragayemo ibyishimo ku kibuga, ariko nyuma y’umukino havuka impaka hagati ya Darren Fletcher n’umwe mu bafana batari bishimiye imyitwarire y’abakinnyi. Fletcher yahise ahagurukira uwo mufana amusaba kubaha abakinnyi, ibintu byashimishije abandi bafana bari aho.