Ubwiyunge bwa Urban Boys, isengesho Humble Jizzo yasubijwe ku isabukuru ye

Humble Jizzo yabitangaje kuri uyu wa Gatandatu tariki 29 Kanama 2026, mu butumwa yanyujije kuri konti ye ya Instagram, aho yasangije abamukurikira uko yakiriye uyu munsi wihariye.

Uyu muhanzi yatangiye ubutumwa bwe ashimira Imana kuba yamuhaye undi mwaka wo kubaho, gukunda, kwiga no gukura, avuga ko buri mwaka mushya ari impano idakwiye gufatwa nk’ibisanzwe.

Yagize ati: “Ni isabukuru yanjye! Mana, ndagushimira ku wundi mwaka w’ubuzima. Nishimiye cyane imigisha ukomeza gushyira mu buzima bwanjye, cyane cyane aba bantu beza wampaye.”

Muri abo bantu, Humble Jizzo yashimiye by’umwihariko umugore we Amy Blauman, amugaragariza ko amufata nk’umwe mu migisha ikomeye Imana yamuhaye. Yagize ati: “Amy Blauman, uri umugisha udasanzwe mu buzima bwanjye. Ndagukunda.”

Humble Jizzo kandi yavuze ko kwizihiza isabukuru ye byabaye kimwe mu bihe byiza kandi by’umwihariko yagize mu buzima bwe. Yashimiye inshuti n’abavandimwe bamusanze mu birori by’isabukuru, bakifatanya na we mu kwizihiza undi mwaka w’ubuzima.

Yavuze ko ibirori byabaye ku munsi wabanje byamubereye “kimwe mu bihe byiza kandi bitazibagirana” yagize, ashimira buri wese waje kumushyigikira no kumwereka urukundo.

Uyu muhanzi kandi yavuze ko muri uyu mwaka Imana yamuzaniye inshuti nshya, ibintu na byo yashyize mu byatumye awufata nk’umwaka wihariye.

Mu bintu bine bikomeye Humble Jizzo yavuze ko byamushimishije muri uyu mwaka, harimo kongera kubona Urban Boyz bahurira ku rubyiniro.

Urban Boyz, itsinda ryamamaye cyane mu muziki nyarwanda, riherutse kongera kugaragara hamwe ku rubyiniro nyuma y’imyaka icyenda, ubwo ryataramiraga abafana muri Zaria Court i Kigali, ndetse n’i Rubavu mu gitaramo cya MTN Iwacu Muzika Festival.

Kuri Humble Jizzo, kuba yarongeye kuririmbana na mugenzi we Nizzo na Safi Madiba, byari ibintu yifuzaga kandi yasengeraga.

Yavuze ko kubona “abahungu” ba Urban Boyz bongeye guhagarara ku rubyiniro ari kimwe mu bintu byamukoze ku mutima cyane. Yagize ati: “Ndashimira Imana kuba yarasubije rimwe mu masengesho yanjye, nkongera kubona abahungu ba Urban Boyz bari hamwe ku rubyiniro.”

Humble Jizzo yavuze ko nubwo hari amasengesho ashobora gusubizwa nyuma y’igihe, iyo Imana iyasubije, ibikora mu buryo bwiza.

Ibi yabivuze mu gihe Urban Boyz yongeye guhurira ku rubyiniro nyuma y’imyaka itari mike buri umwe akomeza ibikorwa bye ku giti cye.

Uretse gushimira Imana ku byo amaze kugeraho, Humble Jizzo yanateguje abakunzi be ko afite amatangazo abiri akomeye ari hafi gutangaza.

Nubwo atigeze atangaza ibyo ayo matangazo azaba arebaho, yavuze ko ari ibintu Imana yamaze gutegura kandi ko atazuyaje kubisangiza abantu igihe nikigera.

Yagize ati: “Hagiye kuza amatangazo abiri akomeye. Mana, sinshobora gutegereza gutangaza ibyo wateguye. Hari ikintu kimbwira ko iki gice gikurikiyeho kigiye kuba cyihariye.”

Yasoje ashimira Imana ku byo yamaze kumukorera ndetse n’ibindi byose yizeye ko bikiri imbere, avuga ko yiteguye gutangira undi mwaka w’ubuzima ayobowe na yo.

Humble Jizzo ni umwe mu bagize Urban Boyz, itsinda ryagize uruhare rukomeye mu kuzamura no gukundisha Abanyarwanda injyana ya Afrobeat, R&B na Hip Hop mu bihe bitandukanye.

Kuri iyi sabukuru ye, ubutumwa bwe bwibanze ku gushimira Imana ku buzima, ku bantu beza yamushyiriye mu buzima, ku nshuti nshya, ku kuba yarongeye kubona Urban Boyz bari hamwe ndetse no ku bindi bikorwa bibiri bikomeye yavuze ko biri hafi gushyirwa hanze.

Humble Jizzo ari kumwe n’umugore we [Uwa kabiri iburyo] yamushimye mu ruhame agaragaza uruhare yagize ku buzima bwe

Humble Jizzo yavuze ko mu isengesho rye, yari yasabye Imana kuzizihiza iyi sabukuru y’amavuko Urban Boys barongeye guhurira ku rubyiniro