Nicosia avuga ko muri Nyakanga 2026 gusa yakiriye ubutumwa bw’abagore barenga 100 bashakaga ko bakundana. Muri rusange, avuga ko kugeza ubu amaze gusabwa urukundo n’abagore bagera kuri 150.
Yamenyekanye cyane nyuma yo gushyira amashusho n’amaforo ye ku rubuga rwa Hot and Single, urubuga rukoresha imbuga nkoranyambaga mu kumenyekanisha abantu bashaka abakunzi.
Mbere y’uko ibibazo bitangira, Nicosia yari atuye i Dallas muri Texas, aho yari yarimukiye muri 2021 kubera akazi yakoraga mu bijyanye n’imari n’ishoramari.
Mu kiganiro n’ikinyamakuru The New York Post, yavuze ko yari afite akazi kandi ubuzima bwe bw’urukundo na bwo bwari bumeze neza. Yari afitanye umubano mwiza n’umukunzi we ndetse bari bafite gahunda yo kubana no gukomeza ubuzima bwabo muri Texas.
Nicosia kandi yari asanzwe akunda gukora siporo no kwita ku mubiri we. Icyakora muri 2025, uruhererekane rw’ibintu bibi rwaje guhindura ubuzima bwe.
Nicosia yakoze impanuka, imuviramo kuvunika ikirenge ndetse agira n’ibindi bikomere ku kaguru, bituma amara amezi atabasha gukora imyitozo ngororamubiri nk’uko yari asanzwe abikora.
Ibyo byabaye nyuma gato y’urupfu rw’imbwa ye yakundaga cyane, Rocky, ubwoko bwa Australian Shepherd. Nyuma yaho, umukunzi we na we yaramukatiye, ibintu Nicosia avuga ko byamubabaje cyane kuko yari afite gahunda yo kubaka ubuzima na we.
Nk’aho ibyo bidahagije, Goldman Sachs yakoragamo na yo yaje kumuhagarika ku kazi.
Nicosia yavuze ko urukurikirane rw’ibyo bibazo rwamwibukije inkuru ya Yobu yo muri Bibiliya, wahuye n’ibigeragezo byinshi byikurikiranya. Ati: “Ubuzima bwanjye bwahindutse nk’igitabo cya Yobu cyo muri Bibiliya.”
Muri Mata 2026, Nicosia yari amaze kwisanga i Dallas wenyine. Yavuze ko abantu benshi bari kumuba hafi babaga kure, mu gihe gushaka akandi kazi na byo bitari biri kugenda neza. Ati: “Nta muntu nari mfite hafi yanjye, bose babaga kure cyane y’ahantu nari ndi.”
Nyuma yaho, imodoka ye na yo yarangiritse ku buryo itari ikibashije gusanwa. Ibi byose byatumye afata icyemezo cyo gusubira iwabo muri Long Island, aho yari asanzwe atuye mbere yo kwimukira muri Texas.
Mu mpera za Kamena, yasubiye kuba iwabo muri Hicksville, aho ababyeyi be n’umuvandimwe we Daniel bamwakiriye.
Nubwo gusubira kuba iwabo nyuma yo kugira akazi keza byari ibintu bishobora gutera umuntu ipfunwe, umuryango we waramushyigikiye.
Nicosia yavuze ko se yari yiteguye kumufasha kubona inzu i New York kugira ngo gahunda yo gushaka umukobwa bakundana irusheho koroha. Ati: “Kunyura muri ibyo byose ndi njyenyine ni ikintu ntakwifuriza n’umwanzi wanjye.”
Mu gihe Nicosia yari agishaka uko yakongera kubaka ubuzima bwe, yafashe icyemezo cyo kujya ku rubuga rwa Hot and Single kugira ngo rumumenyekanishe.
Urwo rubuga rwemeye guhita rumushyira ku mbuga nkoranyambaga zarwo. Mu mashusho yashyizweho, Nicosia agaragara yambaye umupira wera, agaragaza imiterere ye ndetse anyuza intoki mu musatsi. Iyo video yahise ikundwa n’abantu benshi kandi ikurura abagore benshi bashakaga kumumenya.
Nicosia avuga ko abagore benshi batitaye cyane ku kuba yari umushomeri cyangwa kuba yari yarasubiye kuba iwabo n’ababyeyi. Aho kwibanda kuri ibyo, benshi bagaragaje ko bashimishijwe n’imiterere ye, uko agaragara ndetse n’imico ye.
Mu bantu bagera kuri 450 bagize icyo bavuga kuri iyo video, umwe yaranditse ati: “Uyu asa n’umugabo w’inzozi zanjye.” Undi na we yanditse mu buryo bugufi ati: “Mike ni mwiza.” Hari n’umubyeyi watanze igitekerezo amusabira umukobwa we w’imyaka 28.
Nyuma y’uko amashusho ye akwirakwiriye, Nicosia yatangiye kwakira ubutumwa bwinshi bw’abagore bashakaga kumumenya.
Urubuga rwa Cuffed Dating na rwo rwaje gukora ikiganiro na we, rumubaza ku buzima bwe, imico ye n’ibyo ashaka ku muntu bazakundana.
Nicosia avuga ko kuva icyo gihe ubutumwa bwihariye bwatangiye kuza ku bwinshi kandi ko n’ubu bukomeza kuza. Muri Nyakanga, avuga ko hari igihe yakiraga ubutumwa bugera ku 100 buri cyumweru.
Ubu, ukwezi kwa Kanama kuri kurangira, avuga ko akibona abagore bashya batatu cyangwa bane bamwandikira buri cyumweru. Igitangaje ni uko bamwe mu bamwandikiye bari no hanze ya New York.
Nubwo abagore benshi bamwereka ko bamushaka, Nicosia avuga ko atahise ajya mu rukundo. Avuga ko kugeza ubu amaze gusabwa kujya mu rukundo n’abagore bagera kuri 150, ariko we yahisemo neza yitonze abo basohokana bagamije kumenyana.
Kugeza ubu, amaze gusohokana n’abagore batanu gusa.
Nicosia kandi avuga ko ubu ari mu biganiro byo kuba yakwitabira ibiganiro bimwe bya televiziyo byibanda ku bantu bashaka abakundana. Amazina y’ibyo biganiro ntiyayatangaje kuko ibiganiro bikiri mu myiteguro.
Igitangaje kuri Nicosia ni uko impinduka nziza zitagarukiye ku bijyanye n’urukundo. Kuva amashusho ye akwirakwiriye, yatangiye no kubona abantu benshi bamuhamagara ku bijyanye n’akazi.
Avuga ko ubu ari kubona amahirwe menshi y’ibiganiro by’akazi, nyuma y’igihe yari amaze ashaka akazi. Nubwo umwaka ushize wamubujije kugira ubuzima yari yarateganyije, Nicosia avuga ko ubu atangiye kubona ejo hazaza mu buryo bushya.
Ati: “Sinzaba umushomeri iteka, kandi birasa n’aho nzahura n’umuntu ukwiye vuba kurusha uko nabitekerezaga.”
Yongeraho ati: “Nshobora kuba naratakaje ubuzima natekerezaga ko nzagira, ariko ubu mfite amahirwe yo kubaka ubundi bushya.”
Inkuru ya Nicosia yagaragarije benshi uburyo ubuzima bushobora guhinduka mu buryo umuntu atateganyaga: umwaka watangiye ari umwe mu myaka mibi cyane kuri we, none ubu ari kubona amahirwe mashya mu rukundo no mu kazi.
Mike aba iwabo mu rugo i Hicksville, abana n’ababyeyi be, Mike na Luba, ndetse na murumuna we Daniel