Ubu bushakashatsi bwasesenguye amakuru y'abaguzi miliyoni 3.4 hagati ya 2006 na 2015, hifashishijwe amakuru y'amakarita y'ubunyamuryango yakusanyijwe mu maduka akomeye yo mu Bwongereza.
Abashakashatsi basuzumye ibikorwa birenga miliyoni 211 byo kugura, bareba uburyo abagore baguraga ibikoresho by'isuku byifashishwa mu mihango n'imiti igabanya ububabare.
Ibyavuye muri ubu bushakashatsi byatangajwe mu kinyamakuru cy'ubushakashatsi cya PLoS Digital Health, bigaragaza ko hafi kimwe cya kabiri cy'abaguraga tampon cyangwa serviettes z'isuku bahitaga banagura imiti igabanya ububabare.
Paracetamol ni yo ikoreshwa cyane kurusha ibindi
Abashakashatsi basanze mu miti yagurwaga cyane harimo ifite Paracetamol, aho yagize hafi bibiri bya gatatu by’abaguze imiti yo kugabanya uburibwe bwo mu mihango. Indi mibare isigaye yari iy'imiti irimo Ibuprofen.
N’ubwo Paracetamol ari umuti uzwi cyane kandi woroshye kuboneka, impuguke mu by'ubuzima zivuga ko ku bagore benshi bafite ububabare bwo mu mihango, Ibuprofen ishobora kuba ikora neza kurushaho.
Kuki Ibuprofen ishobora kuba ariyo ikora neza?
Mu gihe cy’imihango, nyababyeyi iraguka kugira ngo isohore imyanda yikusanyije imbere yayo. Muri icyo gihe umubiri ukora imisemburo imeze nk'imiti yitwa prostaglandins, ari yo itera uko kwaguka ndetse n'ububabare bukomoka kuri byo.
Ibuprofen ifite ubushobozi bwo kugabanya ikorwa rya prostaglandins, bityo igafasha kugabanya uburibwe ndetse n'ibindi bishobora kujyana na bwo.
Paracetamol yo ikora cyane cyane mu bwonko, aho ibuza ibimenyetso by'ububabare kugera ku bwonko. Ni yo mpamvu ikunze gukoreshwa ku mutwe, umuriro cyangwa ibicurane, ariko ntigire ubushobozi bwo kugabanya uburibwe cyangwa gukumira prostaglandins nk'uko Ibuprofen ibikora.
Hari ikibazo cy'ubumenyi buke ku buribwe bwo mu mihango
Prof. James Goulding wo muri Kaminuza ya Nottingham, umwe mu bakoze ubu bushakashatsi, yavuze ko hakenewe ubukangurambaga bwinshi kugira ngo abagore bamenye neza uburyo bwo guhangana n'uburibwe bwo mu mihango.
Yagize ati: "Hari amahirwe akomeye yo kwigisha abantu kuri iki kibazo. Kandi tugomba kwemera ko ubushakashatsi ku buribwe bwo mu mihango butigeze buhabwa umwanya uhagije."
Yakomeje avuga ko iyo iki kibazo kiba cyibasira abagabo, bishoboka ko ubushakashatsi n'amakuru abugenewe aba ari menshi kurushaho.
Ni ryari umuntu agomba kujya kwa muganga?
Abaganga bavuga ko uburibwe bwo mu mihango busanzwe bubaho ku bagore benshi, ariko iyo buje bukabije ku buryo bubangamira ibikorwa bya buri munsi cyangwa bugatuma umuntu adashobora gukora akazi ke, aba akwiriye kugana muganga.
Ibyo bishobora kuba ikimenyetso cy'izindi ndwara nka Endometriosis, na Uterine Fibroids, zishobora gutera uburibwe bukabije cyane kurusha ubusanzwe.
N’ubwo Ibuprofen ishobora gufasha benshi, abaganga bibutsa ko atari umuti ukwiye buri wese. Abantu bafite ibibazo by'igifu, impyiko cyangwa izindi ndwara zimwe na zimwe bashobora kutemererwa kuwukoresha.
Ni yo mpamvu buri gihe umuntu agomba gusoma amabwiriza ari ku muti cyangwa akagisha inama muganga cyangwa umufarumasiye mbere yo kuwukoresha.
Abahanga basaba abagore kutihanganira ububabare bukabije igihe kirekire, kugisha inama abaganga igihe uburibwe bukabije cyangwa budasanzwe, gukoresha imiti ikwiye kandi bagakurikiza amabwiriza, ndetse no kwitondera gukoresha imiti uko biboneye nta nama y'umuganga.
Ubushakashatsi bugaragaza ko hari abagore benshi bashobora kuba bakoresha imiti itabafasha uko bikwiye, bityo kongera ubumenyi ku miti ikora neza bishobora gufasha miliyoni z'abagore kugabanya ububabare no kunoza ubuzima bwabo bwa buri munsi.