Ubukwe bwa Jeff Bezos na Lauren bwatangijwe n’ibirori by’akataraboneka byitabiriwe n'ibyamamare - AMAFOTO

Ibirori byo kwakira abashyitsi byabereye ahantu hihariye hafi y’urusengero rwa Madonna dell'Orto, ahagaragaraga umwihariko w’amateka n’ubwiza bw’umuco w’Abataliyani. Abari batumiwe bafashwe amafoto bagiye kwinjira mu bwato bagana ahabereye ibirori, harimo ibyamamare bikomeye ku Isi.

Abitabiriye ibirori barimo Orlando Bloom wamaze gutandukana n'umuhanzikazi Katy Perry, Tom Brady, Kris Jenner n’umukunzi we Corey Gamble, ndetse n’abagize umuryango wa Kardashian barimo Kim, Khloé, Kendall, na Kylie.

Hari kandi abandi baherwe bakomeye ku Isi, Leonardo DiCaprio n’umukunzi we Vittoria Ceretti, ndetse na Oprah Winfrey na Gayle King, bose bagaragaye bishimye bari mu bwato bajya kwifatanya n’aba bombi. Tommy Hilfiger n’umugore we Dee Ocleppo Hilfiger nabo bari mu bashyitsi, bose bagaragara bishimiye ibirori by'inshuti zabo.

Amakuru atangwa n’umwe mu bari bahari avuga ko abasaga 30 baje mu bwato buringaniye, aho umutekano wari wakajijwe cyane. Bezos na Lauren bageze ahabereye ibirori nyuma y’abandi bose, bakirwa n'abarinzi bihariye babuzaga abitabiriye ibirori kubegera. Bafashwe amashusho basomana mbere yo kuva mu modoka yaberekezaga ahagomba kubera ibirori, nk'ikimenyetso cy’urukundo rukomeye bafitanye.

Abashyitsi bateguriwe pizza zateguwe n'umutetsi w’umuhanga mu biryo wo muri Napoli. Hari kandi indabyo zirimo amabara y’umweru n’umutuku zatewe ku nkengero z’aho ibirori byabereye, ndetse na piano yacurangwaga mu buryo buciye bugufi, ibintu byatunguye benshi bakurikiye ibi birori.

Nubwo ubukwe bwabo buteguye neza buzaba vuba, Bezos na Sánchez bahisemo gukomeza kugira ibanga ibijyanye n’ibirori byose. Bifashishije kompanyi yitwa Lanza & Baucina Limited, izwi mu gutegura ubukwe bw’ibyamamare bikomeye nk’ubwa George na Amal Clooney mu 2014 na Salma Hayek na François-Henri Pinault mu 2009. Abari gutegura ubu bukwe batangaje ko nta kintu kizabangamira abatuye Venice nubwo hari impaka rusange zirebana n’ubwinshi bw’abakerarugendo.

Meya wa Venice, Luigi Brugnaro, yemeje ko Bezos na Sánchez bazitwara neza. Yagize ati: “Ibihuha bivugwa kuri ubu bukwe nta shingiro bifite. Abatumirwa ni 200 gusa kandi ibirori bizakorwa ku buryo budahungabanya umujyi.” Yongeyeho ko hari ubufatanye hagati ya Leta n’abategura ibirori kugira ngo byose bigende neza kandi mu bwubahane bw’umuco w’umujyi wa Venice.

Amakuru ya Associated Press avuga ko 80% by’ibikoresho bizifashishwa mu birori bizaturuka mu bacuruzi b’imbere mu mujyi. Inzu ikora ibiribwa gakondo yitwa Rosa Salva niyo izategura amafunguro azahabwa abashyitsi, mu gihe inzu ikora ibirahure by’ubugeni yitwa Laguna B yahawe inshingano zo gutegura impano zihariye.

Nubwo bacumbitse muri Aman Hotel—ari nayo George na Amal Clooney bacumbitsemo ubwo bashyingirwaga, banakodesheje amacumbi mu zindi hoteli enye zikomeye zirimo Gritti Palace, St. Regis, Belmond Cipriani, na Hotel Danieli. Icyihariye kuri ubu bukwe ni uko abashyitsi basabwe kutazana impano, ahubwo bagatanga inkunga izifashishwa mu bikorwa by'iterambere mu Mujyi wa Venice.

Ubukwe bw'umuherwe wa gatatu ku Isi, Jeff Bezos n'umukunzi we, Lauren Sanchez bwabimburiwe n'ibirori by'akataraboneka

Mu nzira berekeza ahagombaga kubera ibirori, kwifata byabananiye barasomana abantu bose bareba

Umuherwe Bill Gates nawe yitabiriye ibi birori

Kim Kardashian yari yabukereye

Abo mu muryango wa Kardashian bari bitabiriye ku bwinshi

Oprah Winfrey uri mu bavuga rikijyana mu itangazamakuru yitabiriye ubukwe bw'inshuti ze