Urutonde rwa Henley Passport Index 2026, rushingiye ku mibare y'Ikigo Mpuzamahanga gishinzwe ubwikorezi bwo mu kirere (IATA), rwongeye kugaragaza ibihugu bifite pasiporo zikomeye kurusha izindi ku Isi.
Nk'uko uru rutonde rubigaragaza, Singapore yongeye kuguma ku mwanya wa mbere, mu gihe ibihugu byo ku mugabane w'u Burayi n'uwa Aziya bikomeje kwiharira imyanya yo hejuru.
Naho Leta Zunze Ubumwe za Amerika na zo zinjiye mu bihugu 10 bya mbere, nubwo ziri ku mwanya wanyuma.
Kuki Singapore ikomeje kuba iya mbere?
Singapore yakomeje kuyobora urutonde kuko abaturage bayo bashobora kwinjira mu bihugu 192 badafashe visa mbere y'urugendo. Ibi biterwa ahanini n'umubano mwiza w'iki gihugu n'ibindi bihugu, amasezerano menshi yo gukuraho visa ndetse n'icyizere gifitiwe ku rwego mpuzamahanga.
Ese u Rwanda ruherereye he kuri uru rutonde?
U Rwanda na rwo rwagaragaye muri uru rutonde, aho ruri ku mwanya wa 68 ku Isi mu mwaka wa 2026. Pasiporo itanga uburenganzira bwo kwinjira mu bihugu 67 hatabayeho gusaba visa, cyangwa igatangwa bageze ku mipaka y'ibyo bihugu.
Ibi bigaragaza ko u Rwanda rukomeje kwagura umubano n'amahanga no korohereza abaturage barwo gutembera ku rwego mpuzamahanga, ari na byo bituma pasiporo yarwo igenda irushaho kugira agaciro no kwizerwa mu bihugu bitandukanye.
Ni iki gituma pasiporo iba ikomeye?
Imbaraga za pasiporo zipimwa hashingiwe ku mubare w'ibihugu uyifite ashobora kwinjiramo adasabye visa mbere y'urugendo. Ibihugu bifite umubano mwiza n'amahanga, amasezerano menshi yo gukuraho visa ndetse n'icyizere ku rwego mpuzamahanga ni byo bikunze kugira pasiporo zikomeye.
Ibihugu 10 bifite pasiporo zikomeye kurusha izindi mu mwaka wa 2026
|
Umwanya |
Igihugu |
Umubare w'ibihugu umuntu ashobora kujyamo badafashe |
|
1 |
Singapore |
192 |
|
2 |
Japan, Koreya y'Epfo na Leta Zunze Ubumwe z'Abarabu (UAE) |
188 |
|
3 |
Sweden |
187 |
|
4 |
u Bubiligi, Denmark, Finland, u Bufaransa, u Budage, Ireland, u Butaliyani, Luxembourg, u Buholandi, Norvège na Espagne |
186 |
|
5 |
Austria n'u Bugereki |
185 |
|
6 |
New Zealand n'u Busuwisi |
185 |
|
7 |
Australia n'u Bwongereza |
183 |
|
8 |
Canada |
183 |
|
9 |
Malaysia |
183 |
|
10 |
Leta Zunze Ubumwe za Amerika (USA) |
179 |
Nubwo ubukungu bw'igihugu ari ingenzi, uru rutonde rugaragaza ko imbaraga za pasiporo zishingira cyane ku mubano wa dipolomasi, amasezerano mpuzamahanga ndetse na politiki zerekeye imipaka.
Ku bagenzi, kugira pasiporo iri ku rwego rwo hejuru bisobanura amahirwe menshi yo gutembera mu bihugu byinshi batiriwe banyura mu nzira ndende zo gusaba visa, bikaborohereza ubukerarugendo, ubucuruzi n'izindi ngendo mpuzamahanga.