Mu ijoro ryo kuri uyu wa Kane tariki 3 Ugushyingo
2022, komite itegura iri rushanwa yatangaje urutonde ntakuka rw’abahanzi 10 bo
muri Afurika bahatanye.
Radiyo Mpuzamahanga y’Abafaransa (RFI), ivuga ku wa 14
Ukwakira 2022, ari bwo abagize Akanama Nkemurampaka bahuye bahitamo
abanyamuziki 10 muri 60 bari biyandikishije.
RFI ivuga ko Akanama Nkemurampaka kari kagizwe
n’abahanga mu muziki ku rwego mpuzamahanga barimo n’umunyarwanda Ben Kayiranga;
Claudy Siar, Juliette Fievet, Valérie Passelègue, Anabelle Jogama-Andy, DJ Moh
Green, Valérie Lesbros, Guylaine Clery, Eric Bellamy, Romain Manirampa, Perrine
Champagne, Dudu Saar, Styck, Erick Siar, Ben Oldfield, Mory Touré na Florelle
Manda.
Ben Kayiranga ubarizwa mu Bufaransa niwe wandikishije
Buravan muri Prix Découvertes RFI ubwo ryabaga mu 2018, yaje no kwegukana.
Nyuma yo guteranya amanota, kureba buri kimwe gisabwa kugira ngo abanyamuziki bahatane muri Prix Découvertes RFI, abagize akanama bashyikirije RFI urutonde rw’abanyamuziki 10 bahize abandi batarimo uhagarariye u Rwanda.
Kwiyandikisha muri iri rushanwa byatangiye kuva ku wa 30 Kamena 2022. Urutonde rw’abanyamuziki 10 muri uyu mwaka bahatanye rugizwe na Garçin Lagaçant [Gabon], Ayam [Madagascar], Greg Burkimbila [Burkina Faso], Niino Md [Sénégal], Magdaline Mytil [Haïti], Lukas Luna [Congo (Kinshasa)], Masterland [Burundi], Black AD [Mali], Queen Rima [Guinée] na Tripia Gninnin [Côte d’Ivoire].
Umuhanzi uzatsindira Prix Découvertes RFI y’uyu mwaka
azatangazwa ku wa 18 Ugushyingo 2022 mu birori bizatambuka imbona nkubone ku
rubuga rwa Facebook. Akanama Nkemurampaka kazamuhitamo kazaba karangajwe imbere
n’umunyamuziki wo muri Nigeria, Yemi Alade.
Prix Découvertes RFI itegurwa ku bufatanye na Sacem,
Institut Français, Umuryango Mpuzamahanga w’Abavuga Igifaransa na Unesco.
Kuva iri rushanwa ryatangira kuba rimaze kwegukanwa
n’abarimo Tiken Jah Fakoly (Côte d’Ivoire), Rokia Traoré (Mali), Didier Awadi
(Sénégal), Amadou na Mariam (Mali), Maurice Kirya (Uganda) na Soul Bang’s
(Guinée), King Lesh (2021), Waye (2020), CeÌline Banza (2019) naYvan Buravan
(2018).
Umuhanzi utwaye iki gihembo ategurirwa ibitaramo
bikomeye mu bihugu bitandukanye byo ku mugabane wa Afurika akanakorera
igitaramo i Paris mu Bufaransa.
Uretse guhabwa igihembo anagenerwa amayero 10,000 [Ni
ukuvuga asaga Miliyoni 10 Frw].
Mu 2021, u Rwanda rwahagarariwe na Kaya Byinshi ubarizwa
mu inzu ifasha abahanzi mu bya muzika ya Green Feery Music. Uyu mukobwa
yisanzuye mu njyana ya Pop ariko n’izindi arazizi.
Mu 2020, u Rwanda rwahagarariwe na Mike Kayihura, ni
mu gihe Social Mula yahatanye muri iri rushanwa mu 2019.
Aba bahanzi batangiye gutorwa ku rubuga rwa RFI
Abahanzi 10 bo muri Afurika bahataniye Prix Découvertes RFI 2022
Yemi Alade ni we ukuriye Akanama Nkemurampaka kazemeza uwegukana Prix Découvertes RFI 2022
Ben Kayiranga yari mu Kanama Nkemurampaka kahisemo 10 muri 60 bagera mu cyiciro cya nyuma
RFI iherutse gutangaza ko igihembo cya Prix Découvertes 2022 cy’uyu mwaka yagituye Buravan