Iri rushanwa ry’amahoro ryabaye ku nshuro ya 21 kuva ritangiye mu 2005, ryabereye kuri Stade Amahoro ku Cyumweru tariki ya 14 Kamena 2026. Ryitabiriwe n’abayobozi barimo Umunyamabanga Uhoraho muri Minisiteri ya Siporo, Candy Basomingera, Visi Perezida wa World Athletics, Jackson Tuei, na Perezida wa RAF, Col (Rtd) Kayumba Lemuel.
Uyu mwaka hasiganwe Full Marathon na Half Marathon gusa, nyuma y’uko abantu 4,197 bitabiriye Run for Peace y’ibilometero 10 ku wa Gatandatu. Full Marathon yatangijwe Saa Kumi n’Ebyiri n’Igice za mu gitondo kugira ngo abakinnyi birinde izuba rikabije, ihuza abakinnyi 518 barimo n’abatumiwe baturutse mu marushanwa akomeye ku Isi.
Mu bagabo, Kephar Lumbasi Namutala yatsinze Full Marathon akoresheje amasaha 2:14:19, ashyiraho igihe gishya cy’amateka y’iri rushanwa. Yakurikiwe na Shadrack Kimining na Benard Kipkorir, bose bakomoka muri Kenya. Ntirenganwa Fidèle ni we Munyarwanda wasoreje mu myanya umunani ya mbere.
Mu bagore, Ivyne Jeruto yegukanye intsinzi akoresheje amasaha 2:35:35, na bwo ashyiraho amateka mashya ya Full Marathon y’abagore i Kigali. Tegest Ayalew Ymer wa Ethiopia yabaye uwa kabiri, naho Tsega Desta Mehari aba uwa gatatu.
Half Marathon y’ibilometero 21,098 yitabiriwe n’abakinnyi 2.942. Mu bagabo, Umunya-Kenya Amos Kirui yegukanye umwanya wa mbere akoresheje isaha 1:04:16, akurikirwa na Oscar Kibet wa Uganda na Zakariah Kirika Gacugu wa Kenya. John Hakizimana ni we Munyarwanda wasoreje mu myanya umunani ya mbere.
Mu bagore, u Rwanda rwakoze amateka rwiharira imyanya itatu ya mbere. Ibishatse Angélique yegukanye umudali wa zahabu akoresheje isaha 1:13:30, akurikirwa na Mutuyimana Berthilde na Tuyambaze Thabita.
Abegukanye Full Marathon bahawe 20.000$ ku mwanya wa mbere, 15.000$ ku wa kabiri na 7.500$ ku wa gatatu, mu gihe uwa mbere muri Half Marathon yahembwe 5.000$.
Kigali International Peace Marathon iri ku rwego rwa Elite Label, kandi uyu mwaka yatumiwemo abakinnyi 22 bo ku rwego rwa Gold Label mu rwego rwo gukomeza kuyizamurira ku rwego mpuzamahanga.
