Aya mabwiriza agaragaza ko abaturage b’ibihugu bisaga 60 ku Isi bemerewe kwinjira muri Espagne no kugumayo mu gihe kitarenze iminsi 90 mu minsi 180, badafashe visa mbere y’urugendo.
Mu bihugu bya Afurika byashyizwe kuri uru rutonde harimo: Botswana, Namibia, Eswatini (Swaziland), Lesotho, Mauritius, Seychelles, Cape Verde, n'u Rwanda.
Abafite pasiporo zisanzwe z’ibi bihugu bemerewe kujya muri Espagne nta visa y’igihe gito basabwe mbere y’urugendo.
Ku rundi ruhande, abaturage b’ibihugu byinshi bya Afurika birimo Nigeria, Ghana, Kenya, Maroc, Algeria, Tunisia, Misiri n’ibindi, bagomba kubanza gusaba visa ya Schengen mbere yo kujya muri Espagne.
Ibisabwa mu gusaba visa ya Schengen
Abifuza kujya muri Espagne ariko bakomoka mu bihugu bitari ku rutonde rwemerewe kwinjira nta visa, basabwa gutanga ubusabe kuri Ambasade ya Espagne cyangwa ku kigo cyemewe cya BLS International.
Mu byangombwa bisabwa harimo pasiporo ikiriho agaciro, amafoto aheruka gufatwa, ubwishingizi bw’urugendo, ibigaragaza ubushobozi bwo kwiyishyurira urugendo, aho bazacumbika ndetse n’itike y’indege yemeza urugendo.
Amafaranga yo gusaba visa ku muntu mukuru ni €90. Iyo visa yemerewe uyisabye, ashobora kuguma muri Espagne no mu bindi bihugu bigize Umuryango wa Schengen mu gihe kitarenze iminsi 90 mu minsi 180.
Leta ya Espagne isaba abateganya kuyigenderamo kujya babanza kugenzura amakuru agezweho kuri Ambasade cyangwa inzego zayo zibishinzwe, kuko amabwiriza ashobora guhinduka.