Inkubi y'umuyaga Bavi, nubwo yatangiye kugabanya ubukana, iracyafatwa nk'iteje impungenge kubera imvura nyinshi n'umuyaga ukomeye itwaye. Abahanga mu by'iteganyagihe bavuga ko ishobora guteza imyuzure, inkangu n'ibindi bibazo bikomeye mu bice byinshi byo mu Burasirazuba bwa Aziya.
Mu Bushinwa, abantu barenga miliyoni 1,7 bimuwe mu ntara ya Zhejiang, mu gihe abandi barenga ibihumbi 100 bakuwe mu byabo mu ntara ya Fujian. Biteganyijwe ko Bavi iragera hafi y'umujyi wa Wenzhou utuwe n'abaturage bagera kuri miliyoni 10, aho yari ifite umuvuduko wa kilometero 144 mu isaha.
Muri Taiwan, abaturage barenga ibihumbi 14,000, cyane cyane abo mu bice by'imisozi, na bo bimuwe mu rwego rwo kubarinda ibyago. Leta yahagaritse ingendo z'indege mpuzamahanga zirenga 920 n'iz'imbere mu gihugu 282, ifunga amashuri n'ibiro byinshi bya Leta, ndetse igabanya serivisi za gari ya moshi yihuta. Abantu 87 bamaze gukomereka bazize ingaruka z'uyu muyaga.
Nubwo Bavi itari iteganyijwe kugwa ku butaka bwa Taiwan, abayobozi bahisemo gufata ingamba zikomeye kuko hari ahashobora kugwa imvura yegera metero imwe, ishobora guteza imyuzure n'inkangu.
Mu bindi bihugu byo muri aka karere, ibirwa bya Sakishima mu Buyapani na byo byibasiwe n'imvura nyinshi n'umuyaga ukomeye, mu gihe muri Philippines imvura yatewe n'uyu muyaga yagize uruhare mu mpanuka z'inkangu n'imyuzure zahitanye abantu 17.
Abayobozi b'ibihugu biri mu nzira ya Bavi bakomeje gukangurira abaturage gukurikiza amabwiriza y'umutekano no kwirinda ingendo zitari ngombwa, mu gihe inzego z'ubutabazi zashyizwe mu myiteguro yo gutabara abaturage mu gihe hakomeza kwiyongera ibyago by'uyu muyaga.