Aya mabwiriza yashyizweho n'Ikigo gishinzwe kugenzura internet mu Bushinwa (Cyberspace Administration of China - CAC) ku bufatanye n'izindi nzego za Leta, atangira kubahirizwa ku wa 15 Nyakanga 2026.
Ateganya ko AI itagomba kongera kwigana amarangamutima mu buryo bukabije, guteza umuntu kubatwa na yo cyangwa kwangiza umubano w'abantu mu buzima busanzwe. Yanabujije AI kugirana umubano w'urukundo n'abana bato.
Izi porogaramu zari zimaze kwamamara cyane mu Bushinwa, aho abantu benshi bazikoreshaga baganira n'abakunzi b'ikoranabuhanga babaga bafite ubushobozi bwo kwerekana amarangamutima nk'ay'abantu. Sosiyete zikomeye zirimo ByteDance, Tencent na Alibaba zari zifite izi serivisi.
Nyuma y'itangazwa ry'aya mabwiriza, izo sosiyete zatangiye guhagarika cyangwa kuvugurura serivisi zazo kugira ngo zubahirize amategeko mashya. Ubu chatbot zose zifasha abantu mu buryo bwihariye zigomba kubanza gusuzumwa mbere yo kwemererwa gukoreshwa, kandi Leta ishobora kuzifunga igihe izibonye ziteje ikibazo.
Abayobozi b'u Bushinwa bavuga ko iki cyemezo kigamije kurinda abaturage, cyane cyane urubyiruko, kutisanga rushingiye amarangamutima ku ikoranabuhanga aho kubaka umubano nyawo n'abandi. Ibi bibaye mu gihe igihugu gihangayikishijwe no kugabanuka kw'abashyingiranwa ndetse n'igipimo cy'ivuka ry'abana.
Hari n'impungenge ko aya mabwiriza ashobora no kuzagira ingaruka ku zindi AI chatbots zisanzwe, igihe zaba zitanga ibisubizo bishobora gutuma abakoresha bazizirikaho mu buryo bw'amarangamutima.