Mu kwezi kwa Kamena uyu mwaka, u Burayi bwibasiwe n'ubushyuhe buri hejuru kurusha ubundi bwigeze bubaho muri icyo gihe, aho mu Budage hari aho ubushyuhe bwarenze dogere Celsius 40. Ibi byatumye abaturage benshi bashaka uburyo bwo kwirinda ubushyuhe bukabije.
Steven Scholtysek wo mu Budage yavuze ko nyuma yo kwimukira mu nzu iri hejuru y'inyubako, ubuzima bwamugoye kubera ubushyuhe bwinshi, bituma agura icyuma cya Midea, sosiyete yo mu Bushinwa ikora ibikoresho byo mu rugo. Yavuze ko cyamufashije cyane kandi cyujuje amabwiriza akomeye yubahirizwa mu Burayi.
Abandi baturage bo muri Otirishiya, u Bufaransa n'ibindi bihugu bavuga ko bakomeje gukoresha ibi byuma amasaha menshi ku munsi kugira ngo babashe guhangana n'ubushyuhe.
Sosiyete z'Abashinwa zirimo Midea, TCL na Gree zatangaje ko kugurisha ibi byuma mu Burayi byiyongereye cyane muri uyu mwaka. Hari aho Midea yavuze ko ibicuruzwa byayo byazamutseho hejuru ya 70%, mu gihe TCL yavuze ko mu Bufaransa byazamutseho hejuru ya 300%.
Nubwo bimeze bityo, impuguke zigaragaza ko gukoresha air-conditioners cyane bishobora kongera ikoreshwa ry'amashanyarazi no kuzamura imyuka ihumanya ikirere.
Ishami ry'Umuryango w'Abibumbye ryita ku Buzima (WHO) rivuga ko ibi byuma ari ingenzi mu kurinda ubuzima bw'abugarijwe n'ubushyuhe bukabije, ariko ko bidakwiye gufatwa nk'igisubizo kirambye ku mihindagurikire y'ikirere.
Hari kandi abaturage bavuga ko ibi bicuruzwa byahinduye uko babonaga ibikorerwa mu Bushinwa, bavuga ko bifite ubuziranenge n'ikoranabuhanga rihanganye n'iry'ibikorerwa mu Burayi.