Muri uyu mwaka wa 2026, isi ikomeje kugaragaza impinduka zikomeye mu miterere y’abaturage, aho imibare mishya igaragaza ko igice kinini cy’abatuye isi cyibanze mu bihugu bike cyane.
Ubushakashatsi n’ibarura byakozwe n’ibigo birimo Worldometer n’ibindi bitangazamakuru mpuzamahanga byerekana ko India na China byonyine bifite hafi 36% by’abatuye isi yose.
Kugeza muri Mata 2026, Ubuhinde bukomeje kuza ku mwanya wa mbere nk’igihugu gituwe cyane kurusha ibindi ku isi, gifite abaturage bagera kuri miliyari 1.48, bingana na 18.45% by’abatuye isi bose.
Ubushinwa bukurikiraho bufite abaturage bagera kuri miliyari 1.41, bingana na 17.65% by’abatuye isi. Ibi bihugu byombi bihuriye ku baturage barenga miliyari 2.89, bikaba bihagarariye hafi 36.1% by’abatuye isi.
Amakuru mashya agaragaza urutonde rw’ibihugu 10 bya mbere bituwe cyane ku isi mu 2026. Nyuma y’Ubuhinde n’Ubushinwa, United States (USA) iza ku mwanya wa gatatu ifite abaturage bagera kuri miliyoni 349. Indonesia ikurikiraho ifite miliyoni 288, naho Pakistan ikaza ku mwanya wa gatanu n’abaturage bagera kuri miliyoni 259.
Ku mugabane wa Afurika, Nigeria ikomeje kwigaragaza cyane, iza ku mwanya wa gatandatu ku isi n’abaturage bagera kuri miliyoni 242. Brazil iza ku mwanya wa karindwi ifite miliyoni 214, igakurikirwa na Bangladesh ifite miliyoni 178. Russia iza ku mwanya wa cyenda n’abaturage miliyoni 143, naho Ethiopia igafunga uru rutonde rw’ibihugu 10 bya mbere n’abaturage miliyoni 139.
Uyu mubare ugaragaza neza uko isi igenda ihinduka, cyane cyane ku mugabane wa Afurika uri kwiyongera ku muvuduko wo hejuru. Nigeria na Ethiopia ni zimwe mu bihugu bikomeje kugira ubwiyongere bukomeye bw’abaturage, aho Nigeria iza ku mwanya wa gatandatu ku isi, naho Ethiopia ikaba iya cumi ku rwego rw’isi ndetse ikaza ku mwanya wa kabiri muri Afurika nyuma ya Nigeria.
Ibi byose bigaragaza ko mu myaka iri imbere, Afurika izakomeza kugira uruhare runini mu miterere y’abatuye isi, mu gihe ibihugu byo muri Aziya bikomeje kuyobora ku bwinshi bw’abaturage.