Ikinyamakuru Africa Intelligence, cyanditse ko ifatwa rye rifitanye isano n’iperereza rikomeje gukorwa n’ubuyobozi bw’u Bufaransa ku bantu bakora ibyaha by’iyezandonke, bakoresheje uburyo buhambaye bwo guhisha inkomoko y’amafaranga.
Biravugwa ko izina rya Gims ryagaragaye muri dosiye iri gukorwaho iperereza, ikubiyemo umuyoboro mpuzamahanga w’abakora ibyaha by’imari, aho hakekwa ko hakoreshejwe uburyo burimo ibigo bya ‘sociétés écrans’, konti zifungurwa mu bihugu bitandukanye ndetse n’ishoramari ridahura n’amafaranga umuntu yinjiza mu buryo bwemewe.
Iri perereza rije mu gihe inzego z’u Bufaransa zikomeje gukaza ingamba mu gukurikirana amafaranga ava cyangwa ajya hagati y’u Burayi na Afurika, cyane cyane mu rwego rwo kurwanya iyezandonke n’andi manyanga y’imari.
Mu manza nk’izi, akenshi zicungwa n’inzego zirimo Parquet National Financier, iperereza ryibanda ku ihererekanyabubasha ry’amafaranga rikozwe mu buryo butemewe, nko kohereza amafaranga atatangajwe, cyangwa gushora imari mu mitungo itimukanwa bidahura n’ubushobozi bw’uyishoramo.
Ifatwa rya Gims ku kibuga cy’indege, mu gihe yari agiye kugenda, ritanga ishusho y’uko ashobora kuba yari amaze igihe akurikiranwa n’inzego z’ubutasi mu by’imari, zirimo TRACFIN, cyangwa ko hari icyemezo cy’umucamanza cyari cyatanzwe ngo akurikiranwe.
Kugeza ubu, inzego z’u Bufaransa ntiziratangaza amakuru arambuye kuri iki kibazo, mu gihe iperereza rigikomeje.
Gusa ibi birego, niba byemejwe, bishobora kugira ingaruka zikomeye ku mwuga n’izina by’uyu muhanzi wamamaye ku rwego mpuzamahanga.
Maître Gims ni umwe mu bahanzi bageze ku rwego mpuzamahanga mu muziki wa Afro-pop na rap y’igifaransa.
Uyu muhanzi yubatse izina rikomeye mu Burayi no ku Isi, anyuze mu rugendo rurerure rwatangiriye mu buzima butoroshye kugeza ku kuba icyamamare.
Gims yavukiye i Kinshasa muri Repubulika Iharanira Demokarasi ya Congo mu 1986, ariko yimukira mu Bufaransa akiri umwana muto cyane. 
Yakurikiye mu buzima bugoye i Paris, aho yize ibijyanye n’itumanaho n’ubugeni, ari nako atangira kuririmba ari kumwe n’inshuti ze. 
Yatangiye kumenyekana cyane ari mu itsinda rya hip-hop ryitwaga Sexion d’Assaut, aho yakoranye n’abandi bahanzi barimo Black M.
Iri tsinda ryamuhesheje izina rikomeye mu Bufaransa, ndetse rimufasha kubona abakunzi benshi mbere y’uko atangira gukora ku giti cye. 
Mu 2013, Gims yasohoye album ye ya mbere yise Subliminal, yahise imuha izina rikomeye ku rwego mpuzamahanga. 
Indirimbo nka Bella n’indi yitwa J’me tire zamugize icyamamare cyane, aho zimwe muri zo zarebwe n’abantu barenga miliyoni amagana kuri YouTube. 
Iyi album yaje kugurishwa cyane ku buryo yarenze kopi miliyoni imwe, igahabwa ibihembo bikomeye mu muziki. 
Nyuma y’iyo album, yakomeje gusohora izindi zakunzwe cyane zirimo: Mon cœur avait raison (2015), Ceinture noire (2018) n’izindi.
Zose zageze ku mwanya wa mbere ku rutonde rw’indirimbo mu Bufaransa no mu Bubiligi. 
Indirimbo ye La même yabaye iya mbere mu zacuranzwe cyane mu Bufaransa mu 2018, bituma aba umwe mu bahanzi bakunzwe cyane kuri radio na televiziyo. 
Gims yakoranye n’abahanzi mpuzamahanga bakomeye barimo: Sia, Pitbull, Lil Wayne, Stromae n’abandi.
Ibi byamufashije kwagura isoko rye rikagera ku rwego rw’Isi. 
Uretse umuziki, Gims yashinze label ye bwite yitwa Monstre Marin Corporation, afasha n’abandi bahanzi kuzamuka.

Yanagize uruhare mu bikorwa by’ubugiraneza, harimo gutanga inkunga mu kurwanya indwara nka Ebola. 
Gims akomeje gusohora indirimbo nshya no gukorana n’abandi bahanzi, ndetse mu 2024–2025 yakomeje gushyira hanze indirimbo zakunzwe nka Spider n’izindi zamugejeje ku mwanya wa mbere mu Bufaransa. 
Urugendo rwa Gims rugaragaza uko impano, kwihangana n’akazi gakomeye bishobora gutuma umuntu ava mu buzima busanzwe akagera ku rwego mpuzamahanga.
Uyu muhanzi ni umwe mu batanze isura nshya ku muziki w’Abanyafurika mu Burayi, ndetse akomeza kuba icyitegererezo ku rubyiruko rwinshi rurota kugera kure mu muziki.
Gims ari mu maboko y’inzego z’u Bufaransa nyuma yo gutabwa muri yombi, aho izina rye ryagaragaye mu dosiye y’iyezandonke