Dusabejambo
yashimiwe binyuze mu birori bya “Women in Cinema Gala” byateguwe na Red Sea
Film Foundation ku wa 14 Gicurasi 2026, byabereye muri Hotel du Cap-Eden-Roc i
Cap d’Antibes mu Bufaransa, mu rwego rwo guha agaciro abagore bakomeje kugira
uruhare rukomeye mu iterambere rya sinema ku Isi.
Uyu
mushinga wa “Women in Cinema” ugamije gushyigikira abagore bakora ibikorwa bya
sinema n’inkuru zishingiye ku muco n’ubuzima bwa sosiyete, binyuze mu kubaha
amahugurwa, inkunga ndetse no kubafungurira amarembo ku rwego mpuzamahanga.
Marie
Clémentine Dusabejambo yashyizwe mu bagore batandatu bashimiwe muri uyu mwaka
kubera uruhare rwe mu guteza imbere inkuru zifite aho zihurira n’ubuzima
bw’Abanyarwanda n’umugabane wa Afurika muri rusange.
Yari
kumwe n’abandi bagore bafite amazina akomeye muri sinema ku migabane
itandukanye, barimo umukinnyi wa filime n’utunganya ibikorwa bya sinema wo muri
Nigeria Genevieve Nnaji, umukinnyi wa filime wo mu Buhinde Tara Sutaria,
umuhanga mu gutunganya filime wo muri Indonesia Kamila Andini, umuhanga mu
gukora filime wo muri Mexique Aixa Kay ndetse n’umunya-Maroc Laïla Marrakchi.
Ibi
birori byitabiriwe n’abarimo abayobozi bakomeye mu ruganda rwa sinema
n’ibyamamare mpuzamahanga.
Mu
bari bahari harimo umuyobozi wa Red Sea Film Foundation, Jomana Alrashid,
Umuyobozi Mukuru wayo Faisal Baltyuor, umukinnyi wa filime wo muri Amerika Demi
Moore, umukinnyi wa filime Diane Kruger, Rami Malek ndetse na Michelle
Rodriguez.
Kuba
Dusabejambo yagaragaye muri aba bagore bashimiwe ni indi ntambwe ikomeye kuri
sinema nyarwanda ikomeje kugenda imenyekana ku rwego mpuzamahanga.
Mu
myaka ishize, ibikorwa bye byagiye bigaragara mu maserukiramuco atandukanye
akomeye ku Isi, aho yakomeje kugaragaza inkuru zifite umwihariko ku mateka,
umuco n’ubuzima bw’Abanyarwanda.
Iserukiramuco rya Festival de Cannes riri kuba kuva ku wa 12 kugeza ku wa 23 Gicurasi 2026, rikaba rikomeje guhuriza hamwe abakora sinema, abakinnyi ba filime n’abakunzi bayo baturutse hirya no hino ku Isi.
Marie-Clémentine Dusabejambo yongeye kuzamura ibendera ry’u Rwanda nyuma yo gushimirwa muri “Women in Cinema Gala” yabereye muri Festival de Cannes mu Bufaransa
Abagore
batanu bahawe icyubahiro mu iserukiramuco ’Festival de Cannes’ iri kuba ku nshuro ya 79