Ni urutonde ruyobowe n'Abafaransa Kylian Mbappé na Michael Olise. Nk'uko imibare yatangajwe n’urubuga ruzobereye mu kugena agaciro k’abakinnyi, rwa Transfermarkt, abakinnyi 26 bagize ikipe y’Igihugu y’u Bufaransa bafite agaciro kw’isoko kagera kuri miliyari 1.66 z’Amadolari ya Amerika.
Ibi bituma u Bufaransa buba igihugu gifite ikipe ifite agaciro kari hejuru kurusha izindi kipe zose zizitabira Igikombe cy’Isi cya 2026. Bivuze ko buri mukinnyi wo muri iyi kipe afite impuzandengo y’agaciro ka miliyoni 63.7 z'amadolari.
Agaciro k’u Bufaransa kazamurwa cyane n’abakinnyi barimo Kylian Mbappé, ufite agaciro ka miliyoni 217, ndetse na Michael Olise umaze kuzamuka cyane nyuma y’umwaka mwiza yagize muri Bayern Munich, aho ageze kuri miliyoni 163.
Ikipe y’Igihugu y’u Bwongereza ni yo ikurikiye u Bufaransa, ifite agaciro ka miliyari 1.42 y'amadolari. Muri iyi kipe, Jude Bellingham wa Real Madrid ni we uyoboye abandi n’agaciro ka miliyoni 152, akurikirwa na Declan Rice na Bukayo Saka, bombi bafite agaciro ka miliyoni 130.
Ku mwanya wa gatatu haza Espagne ifite agaciro ka miliyari 1.37 y'amadolari. Iyi kipe ifite ndetse umwihariko w'abakinnyi bato benshi aho iyobowe na rutahizamu w'ikipe ya Barcelona Lamine Yamal kuri ubu ubarirwa agaciro ka miliyoni 217, hamwe na mugenzi we bakinana Pedri ufite miliyoni 163 z'amadorali.
Portugal na yo iri mu makipe ane yonyine afite agaciro karenga miliyari 1.09$, ibintu bigaragaza uburyo ibihugu by’i Burayi bikomeje kwiharira abakinnyi bafite agaciro gakomeye ku isoko ry’umupira w’amaguru.
Ni mu gihe ikipe y'igihugu ya Norvege yari imaze igihe ititabira igikombe cy'Isi yahise yisanga kuri uru rutonde kuko ibarirwa agera kuri miliyoni 652 z'amadolari bijyanye n'agaciro ka rutahizamu wabo Erling Haaland kuri ubu ugeze kuri miliyoni 217 ku isoko ry'igura n'igurisha.
Espagne ifite agaciro ka miliyari 1.37 y'amadolari y'Amerika