Imiriro ikomeye yibasiye amajyepfo y'uburengerazuba bw'u Bufaransa yakomeje gukaza umurego ku Cyumweru, ihatira abantu ibihumbi 55 guhunga mu ijoro rimwe gusa. Ibi byatumye umubare w'abamaze kwimurwa mu gace ka Gironde ugera ku bantu 220.000.
Abayobozi bavuga ko uwo muriro umaze gukwira ku buso bwa hegitari zirenga 42.000, ubunini buruta inshuro enye ubuso bw'Umujyi wa Paris. Uwo muriro ukomeje kwegera umujyi wa Bordeaux, umwe mu mijyi ikomeye izwiho ubukerarugendo n'ubuhinzi bw'imizabibu.
Minisitiri w'Umutekano mu Gihugu, Laurent Nuñez, yavuze ko nyuma y'ijoro rikomeye ku bashinzwe kuzimya inkongi, ikibazo kigikomeye kuko umuriro ukomeje guhindura icyerekezo bitewe n'umuyaga ukaze ndetse ugakwirakwira mu buryo butunguranye.
Abashinzwe kuzimya umuriro bagera ku 2.500 bari ku rugamba, bafashijwe n'indege na kajugujugu 18 bisuka amazi n'imiti izimya umuriro. Ingabo z'u Bufaransa na zo zoherejwe gufasha, mu gihe ibindi bihugu byo ku Mugabane w'u Burayi byatanze indege n'abakozi bashinzwe kuzimya inkongi.
Meya wa Bordeaux, Thomas Cazenave, yavuze ko umuriro ugeze nko mu bilometero 15 uvuye ku mujyi, ariko ko kugeza ubu nta gahunda yo kwimura abaturage ba Bordeaux, batuwe n'abagera ku 268.000.
Mu gace ka Landes na ho hari undi muriro umaze gutuma abantu 36.000 bava mu byabo, bituma umubare w'abimuwe mu majyepfo y'uburengerazuba bw'u Bufaransa urenga 250.000. Mu gace ka Var, hafi y'Inyanja ya Méditerranée, abandi bantu bagera ku 3.000 na bo bimuwe kubera indi miriro.
Muri Espagne, inkongi z'umuriro zikomeje kwibasira cyane agace ka Valencia ndetse n'uturere two mu burengerazuba bwa Madrid, aho zimaze gutuma abantu bagera ku 116.000 bava mu byabo.
Umuntu umwe yapfiriye mu nkongi yibasiye Manises, hafi ya Valencia, ku wa Gatandatu. Ni we muntu wa mbere upfuye muri iyi miriro iheruka kwibasira Espagne, nyuma y'uko mu ntangiriro z'uku kwezi indi nkongi yahitanye abantu 13 mu majyepfo y'icyo gihugu.
Abahanga bavuga ko ubushyuhe bukabije, amapfa n'umuyaga mwinshi bikomeje gutuma imiriro ikwirakwira vuba, bikabangamira ibikorwa byo kuyizimya no kurinda abaturage.