Uyu muganga w'imyaka 41, wiswe izina rya Johannes M. hakurikijwe amategeko y'u Budage arengera umwirondoro w'abaregwa, yahamijwe kwica abagore 12 n'abagabo batatu hagati ya Nzeri 2021 na Nyakanga 2024.
Icyakora, ubushinjacyaha buvuga ko ibyo byaha bishobora kuba ari agace gato k'ibyabaye, kuko kuri ubu buri gukora iperereza ku zindi manza 76 zishobora kuba zifitanye isano n'uyu muganga.
Inkuru dukesha BBC ivuga ko abarwayi bishwe bari bafite imyaka iri hagati ya 25 na 94. Nubwo bose bari barwaye indwara zikomeye, urukiko rwavuze ko nta n'umwe muri bo wari ugeze habi, ubuzima bwanze ku buryo urupfu ari rwo bari bategereje rwonyine.
Ubushinjacyaha bwagaragaje ko uyu muganga yajyaga gusura abarwayi iwabo mu rugo, akabatera uruvange rw'imiti ishobora kwica nta ruhushya cyangwa uburenganzira babimuhereye. Bwanavuze ko inshuro nyinshi yageragezaga gutwika amazu y'abo barwayi kugira ngo ahishe ibimenyetso by'ibyaha bye.
Urugero rwatanzwe ni urwo muri Nyakanga 2024, mbere gato y'uko atabwa muri yombi, aho bivugwa ko yishe abarwayi babiri ku munsi umwe. Uwa mbere yari umugabo w'imyaka 75 wari utuye rwagati muri Berlin, nyuma y'amasaha make akica umugore w'imyaka 76 wari utuye mu kandi gace byegeranye.
Nyuma yo kumwica, ubushinjacyaha buvuga ko yagerageje gutwika inzu y'uwo mugore ariko ntibyamukundira.
Mu gihe cy'urubanza rwamaze hafi umwaka, Johannes M. ntiyigeze agira icyo avuga. Gusa mu kwezi gushize yemeye ko yishe abarwayi 12, avuga ko yibwiraga ko ari kubagirira neza, abavanaho imibabaro baterwaga n'uburwayi bukomeye.
Yabwiye urukiko ati: "Muri icyo gihe cyose natekerezaga ko ari cyo cyiza kuri buri wese." Yananasabye imbabazi ku akababaro yateje imiryango y'abo yishe.
Nubwo yemeye bimwe mu byaha, iperereza ku zindi manza 76 rirakomeje. Ibinyamakuru byo mu Budage bivuga ko nibiramuka bimuhamye, ashobora kuba umwe mu bicanyi ruharwa bakoze ibyaha byinshi kurusha abandi mu mateka y'icyo gihugu.
Mu rubanza, bamwe mu bagize imiryango y'abishwe bagaragaje agahinda kabo. Nyina w'umukobwa w'imyaka 25, wari muto kurusha abandi bose bishwe, yavuze arira ko umukobwa we atigeze agaragaza ko atagishaka gukomeza kubaho.
Umwana biciye nyina w'imyaka 72 wishwe mu 2024 na we yabwiye urukiko ko nyina yari afite gahunda yo kujyana n’umuvandimwe we gutembera ku Nyanja ya Baltic, agaragaza ko yari agifite icyizere cyo kubaho.
Urukiko rwemeje ko uburemere bw'ibyaha yakoze budasanzwe, rumukatira igifungo cya burundu, rutegeka ko azakomeza gufungirwa ahantu hihariye hagamijwe kurinda umutekano rusange, ndetse runamwambura burundu uburenganzira bwo kongera gukora umwuga w'ubuganga.