U Bubiligi: Yvan Muziki na Kitoko bagiye guhurira mu gitaramo cy

Iki gitaramo kiri mu bikorwa ngarukamwaka bigamije guhuriza hamwe Abanyarwanda baba mu mahanga, by’umwihariko abibumbiye muri Diaspora yo mu Bubiligi, mu kwizihiza umunsi wo Kwibohora.

Ni igikorwa gitegurwa n’abanyarwanda baba muri kiriya gihugu, ku bufatanye n’abandi bafatanyabikorwa, hagamijwe gukomeza kwimakaza indangagaciro z’Urugwiro, Ubwitange no Kwiyubaka biranga u Rwanda rushya.

Iki gitaramo kizahuza abahanzi bafite amazina akomeye mu muziki nyarwanda. Yvan Muziki, usanzwe atuye mu Bubiligi, azaririmba zimwe mu ndirimbo ze zifite ubutumwa bujyanye no gukunda u Rwanda no kurubumbatira, zirimo “Ngwino Mama”, “Ibigwi by’Inkotanyi” n’izindi ziganjemo injyana ya gakondo.

Ku rundi ruhande, Kitoko Bibarwa uzava mu Bwongereza yitabiriye iki gitaramo, aherutse gushyira hanze indirimbo nshya yise “Rukundo”, igaruka ku rukundo rufatiye ku muco nyarwanda, agasangiza abitabira iki gitaramo uburyo urukundo n’ubumwe byafashije u Rwanda kwiyubaka nyuma y’amateka akomeye rwanyuzemo.

Uretse aba bahanzi, hazanagaragara Itorero “Itetero” rizasusurutsa abitabiriye binyuze mu mbyino z’umuco nyarwanda, Ballet Icyeza izagaragaza ubuhanga mu kuvanga umuco gakondo n’ubusabane bugezweho. Ababyina b’ibi byiciro babarizwa mu Bubiligi.

DJ Noah na DJ Azamah bazaba bashyushya abitabiriye kuva kare kugeza bucye, bagatuma iki gitaramo kiba icy’imyidagaduro idasanzwe.

Mbere y’igitaramo nyirizina, hazabaho ikiganiro cyihariye kizahuriza hamwe bamwe mu bayobozi, abashakashatsi n’Abanyarwanda bo muri Diaspora.

Iki kiganiro kizibanda ku ruhare rwa Diaspora mu rugendo rw’imyaka 31 u Rwanda rumaze rwiyubaka, hibandwa ku bushobozi bafite mu guteza imbere igihugu haba mu buryo bw’imari, ubumenyi no kwerekana isura nziza yarwo ku rwego mpuzamahanga.

Iki gitaramo kizabera mu Bubiligi ku wa Gatandatu tariki 5 Nyakanga 2025, guhera saa cyenda z’amanywa (15h00).

Kwinjira ni ukwishyura amayero 35 (€35), kandi abategura bashishikariza abitabira kwambara imyambaro yakorewe mu Rwanda, mu rwego rwo kwimakaza umuco n’ibikorerwa mu gihugu cyabo.

Iki gitaramo kiri mu bisanzwe bituma Abanyarwanda baba hanze bumva ko bafite uruhare rukomeye mu rugendo rwo gukomeza kubaka igihugu cyabo. Ni n’amahirwe yo kongera guhurira hamwe, gusabana no gutaramira ku bihangano by’abahanzi bakomeje gufata iya mbere mu guteza imbere umuco nyarwanda ku rwego mpuzamahanga.

Yvan Muziki, ubarizwa mu Bubiligi kuva igihe kirekire, amaze kumenyekana nk’umuhanzi ushyira imbere injyana gakondo ndetse n’ubutumwa bwubaka.

Kitoko Bibarwa we, ari mu bahanzi batangiye muzika mbere ya 2009, akaba yaramaze imyaka myinshi mu Bwongereza aho akomeje kubarizwa, ariko akagaragaza ko umuco we atawibagiwe.

Uretse guhurira muri iki gitaramo, bombi bitezweho no gutanga icyizere ko umuziki nyarwanda ukomeje kuba intwaro yo kumenyekanisha igihugu no kubaka umuryango nyarwanda uhamye.