Tyla yongeye gukomeretsa inkovu ya Davido mu bihembo bya Grammy

Mu mwaka wa 2024, ni bwo Tyla yatunguranye atwara Grammy ye ya mbere ariko icyo gihe yari ataratanga akazi gakomeye cyane. Muri uwo mwaka, Davido yari yarakoze cyane yumva ko uko byagenda kose yegukana igihembo ariko birangira byanze.

Mu mwaka wa 2025, Davido yongeye kugerageza guhatanira Grammy ariko Tems nawe wo muri Nigeria amuhigikisha indirimbo “Love me Jeje” icyo gihe ntiyatangaza byinshi nka mbere muri 2024.

Muri uyu mwaka wa 2026, Davido yari yaserukanye n’umugore we Chioma mu birori byo gutanga Grammy ku nshuro ya 68 aho yari afite icyizere cy’uko indirimbo “With you” yakoranye na Omah Lay yamuha Grammy.

Inkuba itagira amazi yongeye kumukubitira ku ndirimbo “Push 2 Start” ya Tyla yegukanye iyi Grammy mu cyiciro cya Best African Music Performance.

Tyla ntabwo akubise Davido gusa ahubwo yahigitse Burna Boy, Wizkid, Ayra Starr, Edy Kenzo, Omah Lay, Mehran Martin. Ikindi, Tyla yegukanye iki gihembo ku ndirimbo yakoze ari wenyine mu gihe abo bari bahanganye bagiye bakorana ari abahanzi babiri babiri.

Impamvu Davido ari we ubaye inkuru, ni uko yigaragaza nk’aho ari we muhanzi wa mbere muri Africa cyane ko avuga ko ari 001 gusa akaba atari yabasha kwegukana Grammy n’imwe cyane ko amaze guhatana inshuro 5 ariko nta na rimwe arasekerwa n’amahirwe ngo abike iki gihembo.