Twiteguye gufatanya namwe - Meya Sebutege Ange yakira ibyamamare mu iserukiramuco i Huye –VIDEO

Iri serukiramuco ryatangiye kuri uyu wa Gatanu tariki ya 19 Werurwe 2026, rifite intego yo kwimakaza umuco nyarwanda, amateka n’indangagaciro binyuze mu buhanzi, by’umwihariko rikanigisha urubyiruko.

Abitabiriye iri serukiramuco babanje gusura ahantu ndangamateka hatandukanye mu Ntara y’Amajyepfo, mu rwego rwo kurushaho gusobanukirwa amateka n’umuco by’u Rwanda.

Mu ijambo rye ry’ikaze, Meya Sebutege Ange yagaragaje ko ubuyobozi bw’Akarere ka Huye n’abaturage biteguye gufatanya n’abahanzi no kubashyigikira muri uru rugendo rwabo.

Yagize ati: “Turabifuriza kuzagira ibihe byiza mu Karere, mu izina ry'abaturage b'Akarere nagirango mbabwire ko twari tubakumbuye cyane. Ngira ngo ibyishimo mwabonye muri uru rubyiruko n'abandi batabashije kuza kubera gahunda tuzi ari ndende n'igihe tuzamarana nabo nagira ngo tubabwire ko tubiteguye, twiteguye kwishimana namwe, ndetse twiteguye no kuzafatanya namwe mu bihangano muduha bikatunyura, bikatwigisha, kandi bikanatugwa neza, bigatuma tunatekereza neza."

Yakomeje agaragaza ko iri serukiramuco rifite uruhare rukomeye mu kwimakaza ururimi n’umuco by’Abanyarwanda, anashimira Perezida wa Repubulika, Paul Kagame, ku bukangurambaga bwo guteza imbere ikoreshwa ry’Ikinyarwanda. Ati: “Ni gahunda nziza kandi dushimira Nyakubahwa Perezida wa Repubulika, Paul Kagame ko yatwibukije kujya tuvuga ururimi rwacu neza."

Meya Sebutege kandi yibukije ko Akarere ka Huye ari igicumbi cy’umuco n’uburezi mu Rwanda, gatuwe n’abaturage barenga ibihumbi 400, kandi gafite amateka akomeye ashingiye ku burezi n’umuco.

Yavuze ko iri serukiramuco riri gutanga umwanya wo kungurana ibitekerezo ku ndangagaciro ziranga Abanyarwanda, zirimo imihigo, kwivuga, guhigura, urwenya n’izindi, bikazafasha urubyiruko kuzisobanukirwa no kuzishyira mu buzima bwa buri munsi.

“Siga Art Festival” izamara iminsi itatu, ihuza abahanzi n’abakunzi b’imyidagaduro baturutse hirya no hino mu gihugu. Buri joro hazajya habaho ibitaramo n’ibiganiro by’ubusabane bigamije gusangira ubunararibonye.

Ku wa Gatandatu tariki ya 20 Werurwe, hateganyijwe igikorwa cyiswe ‘Intambwe ya Nyirarumaga’ (Nyirarumaga Women Walk), kigamije kuzirikana no gushimira uruhare rw’abagore mu buhanzi, umuco n’iterambere ry’igihugu, by’umwihariko muri uku kwezi kwahariwe abagore.

Icyo gikorwa kizaba kirimo gusura ahantu nyaburanga, gufata amashusho n’ibyamamare (Meet and Greet) ndetse no gutaramira ku musozi witiriwe abahanzi.

Iserukiramuco rizasozwa ku Cyumweru tariki ya 22 Werurwe 2026, hateganyijwe igitaramo gikomeye kizabera muri Stade ya Kaminuza y’u Rwanda, ku munsi wahariwe abahanzi.

“Siga Art Festival” igaragaza imbaraga zishyirwa mu guteza imbere ubuhanzi nk’inkingi y’umuco n’iterambere, by’umwihariko mu rubyiruko, ari na ko Huye ikomeza kwigaragaza nk’umutima w’umuco nyarwanda.

Mu rugendo-shuri rugana mu Ntara y'Amajyepfo abarimo Kevin Kade, Christopher Muneza, Titi Brown na Muhizi Serge bitabiriye iserukiramuco 'Siga Art Festival'

Umusizi Rumaga Junior yasobanuye imvano yo gutegura iri serukiramuco, kandi agahera mu Karere ka Huye mu Majyepfo y'u Rwanda

Abiganjemo ibyamamare bahagurukiye mu Mujyi wa Kigali, babanza kuganirizwa mbere y'uko berekeza i Huye, ku gicumbi cy'umuco n'uburezi

Mu nzira bagenda, bagiye basura ibice bitandukanye nyaburanga mu rwego rwo kwiga amateka, ari na ko basobanurirwa

Iri serukiramuco rizamara iminsi itatu, rihuje abahanzi mu ngeri zinyuranye z'ubuhanzi hagamijwe kwiga indangagaciro, no gusigasira ururimi rw'Ikinyarwanda

Kuva kuri Jules Sentore, Christopher, Producer Element na Diez Dolla bashyigikiye mugenzi wabo Rumaga mu iserukiramuco

Abahanzi bitabiriye ‘Siga Art Festival’ basabwe gukoresha impano zabo mu kwigisha urubyiruko indangagaciro, mu gihe Huye ibizeza ubufatanye mu rugendo rwabo rw’ubuhanzi

‘Siga Art Festival’ yatangiriye i Huye mu buryo bushimishije, itangirana n’urugendo ku mateka n’umuco, ubuyobozi bw’akarere buhamya ko bwiteguye gushyigikira impano z’abahanzi

Ubwo mu minsi ishize, Meya Sebutege [Uri hagati] yakiraga Rumaga n'umuhanzi Christopher mu gutangaza ku mugaragaro ibijyanye n'iri serukiramuco 'Siga Art Festival' ribaye ku nshuro ya mbere

KANDA HANO UBASHE KUREBA IJAMBO RYA MEYA SEBUTEGE ANGE YAKIRA IBYAMAMARE I HUYE

KANDA HANO UREBE UKO IBYAMAMARE BYAKOZE URUGENDO RUGANA MU MAJYEPFO Y’U RWANDA