Kuri uyu wa Kabiri saa Moya z’Umugoroba nibwo ikipe ya rayon Sports irakina na Jamus FC yo muri Sudani y’Epfo muri ½ cya CECAFA Kagame Cup 2026 irimo irabera mu Rwanda.
Mbere y’uko uyu mukino ukinwa,umutoza wa Jamus FC, Saber Ben Jabria yavuze ko kuba bagiye gukina na Rayon bafite Muhire Kevin wayikiniye ari ibintu bibatera imbaraga.
Yagize ati: "Ahubwo ni byo bidutera imbaraga kurushaho. Ni byo biduha ishyaka ryo gukora neza.Kevin ni umukinnyi ufite ubunararibonye kuko yakiniye Rayon Sports. Iyo uhuye n'ikipe yakiniye, uba ufite inyota yo kwigaragaza no kwerekana ubushobozi bwawe."
Yakomeje ashimangira ko nubwo Rayon Sports ari ikipe Kevin afitiye urukundo rwihariye, ari umukinnyi wabigize umwuga ugomba gukora inshingano ze muri Jamus FC.
Yagize ati: "Rayon Sports ni ikipe afitiye amarangamutima, twese turabizi. Ariko ni umukinnyi wabigize umwuga. Agomba kumenyera no gukorana umurava na Jamus, ikipe ye nshya. Ejo azitanga uko ashoboye kose. Muzamubona akina umukino mwiza "
Agaruka ku mvune uyu mukinnyi w’Umunyarwanda aheruka kugira yavuze ko arimo arakira neza ariko ko amhirwe yo gukina uyu mukino ari 50 kuri 50.
Yakomeje avuga ko igihe cyose uwo mukinnyi yazabona amahirwe yo gukina, yaba atangiye umukino cyangwa yinjiye mu gice cya kabiri, azitanga uko ashoboye.
Yagize ati: "Nabona amahirwe yo gukina, azitanga kugeza ku munota wa nyuma. Ndetse n'aramuka yinjiye mu gice cya kabiri, na bwo azakora ibishoboka byose afashe ikipe."
Jamus FC yazamutse muri ½ ivuye mu itsinda B yarimo n'amanota 7.