Trump yategetse ko amabendera yururutswa kugeza hagati mu kunamira Dolly Parton

Perezida wa Leta Zunze Ubumwe za Amerika, Donald Trump, yategetse ko amabendera y’Amerika yururutswa akagera kuri kimwe cya kabiri mu gihugu hose mu cyumweru kimwe mu rwego rwo kunamira uyu muhanzikazi.

Trump yavuze ko urupfu rwa Dolly Parton ari igihombo gikomeye ku bantu babarirwa muri za miliyoni, ashimangira ko hatigeze habaho undi muntu umeze nka we kandi ko n’undi nk’uwo atazongera kubaho.

Yagize ati: “Mu cyubahiro cye, ndategeka ko ibendera rya Amerika ryururutswa mu gihugu hose mu gihe cy’icyumweru, guhera saa kumi n’ebyiri z’umugoroba. Ruhukira mu mahoro Dolly! Isi yose iragukunda.”

Aya magambo ya Trump aje mu gihe Dolly Parton yari amaze imyaka myinshi afatwa nk’umwe mu bahanzi bake bashoboye gukundwa n’abantu bafite ibitekerezo bya politiki bitandukanye muri Amerika.

Yashimwaga n’abantu b’ingeri zose, ariko ahitamo kutivanga muri Politiki

Mu myaka isaga 60 yamaze mu ruhando rwa muzika, Dolly Parton yubatse izina rikomeye cyane, ariko kimwe mu byamuranze ni ukwirinda kugira uruhande rwa politiki yiharira.

Nubwo yari afite ijambo rikomeye muri sosiyete ya Amerika, yakunze kwirinda guhindura umuziki we urubuga rwa politiki.

Mu 2023, mu ndirimbo ye “World on Fire”, yagarutse ku bibazo bya politiki, anenga abanyapolitiki bafite umururumba n’abatagira ukuri, ariko muri rusange yakomeje kumenyekana nk’umuhanzi washoboraga gukundwa n’impande zitandukanye.

Dolly Parton kandi yari yarigeze guhabwa inshuro ebyiri umudari wa Perezida wa Amerika “Presidential Medal of Freedom”, ariko ntiyawuhawe mu gihe cya Trump.

Yasobanuye ko ku nshuro ya mbere atashoboraga kuwemera kubera ko umugabo we yari arwaye, naho ku nshuro ya kabiri akanga kujya mu ngendo kubera icyorezo cya COVID-19.

N’ubuyobozi bwa Joe Biden bwaje kumusaba kwakira icyo gihembo, ariko Parton agaragaza impungenge ko kugihabwa bishobora gutuma abantu babifata nk’uruhande rwa politiki ahisemo. Ati: “Numva ko ninkakira nzaba ndi gukora politiki.”

Ibi byagaragazaga uburyo uyu muhanzikazi yashakaga gukomeza kuba uwa buri wese, aho kuba uwa politiki cyangwa itsinda runaka.

Urupfu rwa Dolly Parton rubaye hashize igihe gito umugabo we Carl Thomas Dean na we yitabye Imana.

Carl Dean yapfuye muri Werurwe umwaka ushize afite imyaka 82, nyuma y’imyaka hafi 60 yari amaze ari umugabo wa Dolly Parton.

Nubwo Dolly Parton yamaze ubuzima bwe bwose ari mu ruhando rw’ibyamamare, we n’umugabo we bahisemo kubaho ubuzima bwabo bwite kure y’amaso y’itangazamakuru.

Icyo ni kimwe mu byatumye umubano wabo umara imyaka isaga 60, mu gihe ubuzima bw’ibyamamare akenshi butuma imibanire y’abashakanye ijya mu bibazo kubera itangazamakuru n’amaso y’abantu.

Mu 2015, Parton yavuze ko kuba umugabo we atari umuntu ukora muri ‘showbiz’ ari kimwe mu byatumye umubano wabo ukomeza kugira ubuzima.

Yavuze ko Carl Dean atigeze agira ishyari ry’ibyo yakoraga, ahubwo ko yakundaga kumva ibyo akora, na we akishimira kumva ibyo umugabo we akora.

Nyuma y’urupfu rwa Dean, Dolly Parton yavuze ko umugabo we “ari mu maboko y’Imana” kandi ko ibyo yabashije kubyakira.

Mu gihe yasezeraga ku mugabo we, yari yavuze ko imyaka isaga 60 bamaze babana ari urwibutso rw’urukundo rutapfa gusobanurwa n’amagambo.

Mbere y’urupfu rwe, Dolly Parton yari aherutse kuvuga ko yari afite ibibazo bimwe na bimwe by’ubuzima, ariko ko yari akomeje gukora.

Mu kiganiro yagiranye n’ikinyamakuru People cyasohotse ku wa Gatanu, yavuze ko yari amaze igihe ahanganye n’ibibazo by’ubuzima yari yarirengagije mu gihe yitaga ku mugabo we.

Yavuze ko nubwo yari agikomeza gukira, atigeze ahagarika ibikorwa bye. Ati: “Nubwo nkiri gukira, ndacyakora.”

Ntiyigeze atangaza mu buryo burambuye ikibazo cy’ubuzima yari afite, ahubwo yakomeje kugaragaza imishinga mishya yari afite.

Muri iyo mishinga harimo n’umushinga wa Dolly’s Life of Many Colors Museum i Nashville, wari umwe mu bikorwa yari akomeje gutegura.

Ibi byagaragazaga ko no mu bihe bikomeye by’ubuzima bwe, Dolly Parton yari agifite ubushake bwo gusiga umurage urenze umuziki.

Nubwo Dolly Parton yari umuntu wamenyekanye ku rwego mpuzamahanga, umuhango wo kumusezeraho uteganyijwe kuba uw’ibanga kandi muto.

Itangazo ryatangajwe rivuga ko, ku byifuzo bye, azasezerwaho n’umuryango we wa hafi gusa.

Ibi bivuze ko abafana be benshi ku isi batazabona umuhango munini wo kumusezeraho, nubwo ari umwe mu bantu bagize uruhare rukomeye mu mateka ya muzika ya Amerika.

Ahubwo umurage we uzasigara mu ndirimbo ze, ibikorwa bye, amashusho, ubufasha yatanze ndetse n’uruhare yagize mu guteza imbere umuco n’ubuhanzi.

Dolly Parton ntiyari gusa umuririmbyi wa Country Music.

Yabaye umwanditsi w’indirimbo, umucuranzi, umukinnyi wa filime, umushoramari ndetse n’umuntu wagize uruhare mu bikorwa bitandukanye by’ubugiraneza.

Mu myaka isaga 60, yubatse izina ry’umuhanzi ushobora guhuza ibisekuru bitandukanye, abantu bo mu byiciro bitandukanye ndetse n’abafite ibitekerezo bya politiki bitandukanye.

Ni yo mpamvu amagambo ya Donald Trump avuga ko “hatigeze habaho umuntu umeze nka Dolly Parton kandi n’undi nkawe atazongera kubaho” yumvikanamo uburemere bw’umurage uyu muhanzikazi asize.

Dolly Parton yasezeye ku isi, ariko indirimbo ze, ibikorwa bye n’inkuru y’ubuzima bwe bizakomeza kumvikana mu myaka iri imbere.

Kuri benshi, Dolly Parton ntabwo ari gusa umuhanzikazi wa Country Music wapfuye; ni igice cy’amateka ya muzika ya Amerika cyafunze igice cyacyo, ariko umurage we ukaba uzakomeza kubaho